काठमाडौंँ, १२ चैत– पाँच तारे होटलमा सञ्चालित क्यासिनोमा नेपाली नागरिकलाई प्रवेश निषेध भएपछि काठमाडौं भित्र मिनिक्यासिनोका अवैध धन्दा फष्टाएको छ । महानगरीय प्रहरी परिसर काठमाडौंँका प्रमुख समेत रहनुभएका वरिष्ठ प्रहरी उपरीक्षक विश्वराज पोखरेलले विशेष गरी तस्करी (अबैध) क्रियाकलापमा संलग्न व्यक्तिहरु जुवा खेल्न सक्रिय रहेको बताउनुभयो ।

उहाँले पछिल्लो एक महिनामा राजधानीका ३० वटा अवैध जुवाघरबाट दुई सय जना जुवाडे पक्राउ परेको जानकारी दिनुभयो । उनीहरुको साथबाट प्रहरीले करीव २५ लाख रुपियाँ नगद बरामद गरेको छ । 
घर तथा कोठा भाडामा लिएर, होटल, रेष्टुराँ र रिसोर्ट बुकिङ गरी पेशेवररुपमा जुवा खेल्नेको सङ्ख्या बढेको छ, परिसर प्रमुख पोखरेलले भन्नुभयो, ‘पक्राउ परेकामध्ये कुनै व्यक्तिले मनोरञ्जनका लागि जुवा खेलेको दावी गरेका छैन्न ।’ 

युवती र मदिरापान पनि 
घर तथा फ्ल्याट भाडामा लिइ सञ्चालन गरिएका जुवा घरमा मदिरासंँगै यौनधन्दा समेत हुने गरेको छ । सहयोगीको रुपमा राखिएका युवतीसँग जुवाडेले यौन शोषण गर्ने गरेको प्रहरीले दावी गरेको छ । 

महानगरीय प्रहरी वृत्त बालाजुका प्रमुख प्रहरी नायव उपरीक्षक विश्वराज खड्काले धेरैजसो जुवा अखडाबाट युवती समेत पक्राउ परेको जानकारी दिनुभयो । विशेष गरी पेशेवर जुवा अखडामा खाना र सुत्ने व्यवस्थासहित मदिरा तथा युवती भेटिएको प्रहरीले दावी गरेको छ । 

फितलो कानुन
मौजुदा जुवा सम्वन्धी ऐन फितलो रहेको महानगरीय प्रहरी परिसर काठमाडौंका मुद्दा शाखा प्रमुख मोहनकुमार थापाले बताउनुभयो । विद्यमान कानूनअनुसार जुवा खेल्ने र खेलाउनेलाई तीन दिनसम्म थुन्न सक्ने र दुईसय रुपियाँ जरिवाना गर्ने ब्यवस्था छ । 

त्यस्तैं, जुवा खेल्न सघाउने वा हेर्नेलाई पनि दुई दिनसम्म थुन्ने र ५० देखि एकसय रुपियाँ जरिवानाको ब्यवस्था छ । जुवा सम्वन्धी कानुन नै फितलो भएका कारण राजधानीमा जुवा अखडा मौलाउदै गएको प्रहरीको दावी छ ।, गोरखापत्रमा खबर छ ।