१९ असार २०८३, शुक्रबार
बुटवल, २६ चैत– केही महिना अगाडिदेखि मात्र सञ्चालनमा आएको रूपन्देहीको तिलोत्तस्थित पाँचतारे टाइगर प्यालेस रिसोर्टले क्यासिनोमा अन्त शुल्क इजाजत बिना मदिरा विक्री गरेको खुलेको छ । यो दक्षिण एसियाको ठूलो क्यासिनो रहेको दाबी गरिएको छ । होटल र क्यासिनो सञ्चालक छुट्टाछुट्टै भए पनि सञ्चालकले होटलबाट मदिरा लिएर क्यासिनोमा बेच्ने गरेकाे पाइएको हो ।
होटल र क्यासिनोको प्यान नम्बर पनि अलग–अलग हुनुपर्छ । होटलको प्यान नम्बर पनि सुपर हेरिटेजको नाममा रहेको छ । राजश्वका प्रमुख कर अधिकृत अर्जुन ढकालले क्यासिनो सञ्चालनको अनुमति लिएको रिसोर्टले मदिराको अनुमति लिन पटक–पटक आग्रह गरेपनि नमानेपछि छापा मारिएको लोकान्तरलाई बताए ।
प्रहरीसहित पुगेको अनुसन्धानको टोलीले क्यासिनोमा छापामारी मदिरा नियन्त्रणमा लिएको छ । ढकालका अनुसार ३ लाख रुपैयाँ बराबरको १ सय २१ बोतल मदिरा नियन्त्रणमा लिइएको छ ।
हङकङका लगानीकर्ताको ५ अर्ब २० करोड रुपैयाँ लगानीमा पाँच तारे टाइगर प्यालेस रिसोर्ट सञ्चालनमा आएको हो । क्यासिनो निर्माणमा मात्रै दुई अर्ब लगानी गरिएको छ । रिसोर्ट बुद्धजन्मस्थल लुम्बिनीदेखि १९ किलोमिटर र भारतको सुनौलीदेखि ८ किलोमिटर मात्रै टाढा छ ।
