काठमाडौं, १५ वैशाख– नेपाली कांग्रेसको केन्द्रीय कार्यसमितिको बैठकमा सभापति शेरबहादुर देउवाले आज जवाफ दिने भएका छन् । चुनावी समीक्षाका लागि आह्वान गरिएको बैठकमा बोल्ने केन्द्रीय सदस्यहरुले उठाएका प्रश्नको सभापति देउवाले जवाफ दिन लागेका हुन् । 

हिजोको बैठकमा वरिष्ठ नेता रामचन्द्र पौडेल र नेता विजय गच्छदारले बोलेपछि बैठक आजसम्मका लागि स्थगित गरिएको थियो । केन्द्रीय कार्यसमितिले गर्ने निर्णयहरुमा सहमति जुटाउनका लागि बैठक स्थगित गरिएको हो । 

बैठकमा महासमिति बैठकको मिति र स्थान, विधान संशोधन मस्यौदा समिति गठन, केन्द्रीय निर्वाचन समिति गठनलगायत विषयमा निर्णय लिने सभापति शेरबहादुर देउवाको तयारी छ । चैत ९ गतेदेखि जारी केन्द्रीय समिति बैठकमा चुनावमा भोगेको पराजयलाई लिएर सभापति देउवा र पौडेल तथा सिटौलापक्षबीच आरोपप्रत्यारोप भएको छ ।