काठमाडौं, ३ जेठ– मदन स्मृति दिवसको अवसर पारेर नेपालका दुई ठूला कम्युनिस्ट पार्टी एमाले र माओवादी केन्द्र एक भएका छन् । 

प्रतिनिधिसभा र प्रदेशसभा निर्वाचनमा भाग लिनुअघि दुई दलले चुनावी तालमेल गदै पार्टी एकता घोषणा गरेका थिए । जसलाई उनीहरुले अन्तिम रुप दिएका छन् । 

लेनिन जयन्तीका दिन पार्टी एकता गर्ने तयारी गरिएको भएपनि दुई दलमा कुरा मिल्न नसक्दा रोकिएको थियो । जसलाई निरन्तरको छलफल र वार्ताबाट दुई दलले मिलाएका छन् र पार्टी एकता गरेका छन् । 

विहान सात बजेदेखिनै दुई दलका शीर्ष नेता पार्टी एकताका लागि व्यस्त बने । नेताहरु दिनभर निकै व्यस्त देखिए भने प्रधानमन्त्रीको सरकारी निवास पार्टी कार्यालय जस्तो देखिएको थियो ।

दिनभर के भए ?

बुधबार एमाले अध्यक्ष केपी ओली र माओवादी अध्यक्ष प्रचण्डबीचको वानटुवान वार्ता पछि विहीबार एकता गर्ने निर्णय भएको थियो । 
जस अनुसार आज विहान एकता संयोजन समितिको बैठक बोलाइएको थियो । 

आठ बजे

नेकपा एमालेका तत्कालिन महासचिव  मदन भण्डारीको २०५० साल जेठ ३ गते सवारी दुर्घटनामा निधन भएको थियो । भण्डारीको स्मृतिमा एमालेको पुरानो कार्यालय बल्खुमा रहेको मदन आश्रितको प्रतिमामा माल्यार्पण गर्न एमाले अध्यक्ष ओलीसहित माओवादी केन्द्रका अध्यक्ष प्रचण्ड पुगेका थिए । 

कार्यक्रममा प्रचण्डले पार्टी एकता भण्डारीको स्मृति दिवका दिन गर्न आफूले प्रस्ताव गरेको बताएका थिए । 

दश बजे

पार्टी एकता संयोजन समितको बैठक विहान ११ बजे बालुवाटारमा शुरु भयो । त्यसअघि एमाले र माओवादीका नेताले बालुवाटारमा बृक्षारोपण गरेका थिए । रुख विरुवा रोपेसँगै एकता संयोजन समितिको बैठक बसेको थियो । जसले पार्टी एकता गर्ने प्रस्तावलाई अनुमोदन, ९ सदस्यीय सचिवालय, ४५ सदस्यी स्थायी समिति, ४ सय ४१ सदस्यीय केन्द्रीय समिति बनाउने निर्णय ग¥यो । बैठकले विष्णु पौडेललाई महासविच र नारायणकाजी श्रेष्ठलाई प्रवक्ता बनाउने निर्णय गरेको थियो । 

दुई बजे

संयोजन समितिको बैठक बसेपछि दुई दलको छुट्ट छुट्टै केन्द्रीय समितिको बैठक बसेको थियो । बैठकले पार्टी एकताको प्रस्तावलाई अनुमोदन गरेको थियो । 

साढे तीन बजे

दुई दलको छुट्टा छुट्टै बैठक पछिको संयुक्त बैठकमा नवगठित दल नेपाल कम्युनिष्ट पार्टीका केन्द्रीय सदस्यहरुले पद तथा गोपनियताको शपथ लिएका थिए । केपी ओलीले सदस्यहरुलाई शपथ गराएका थिए । 

चार बजे

शपथपछि बैठकले ८ बुँदे निर्णय गरेको छ । जसअनुसार पार्टी दर्ताका लागि सुभाष नेम्वाङ र देव गुरुङलाई खटाउने निर्णय भएको थियो । 

कार्यकर्ताले कुर्चीमा चार घन्टा कुरे

चार बजे राष्ट्रिसभा गृहमा एकीकृत पार्टीको घोषणा हुने भएपछि एमाले र माओवादीका कार्यकर्ता दिउँसो १ बजेदेखि नै राष्ट्रियसभागृह पुगेका थिए । जसका कारण चार बज्दा सभागृहमा पाइलो हाल्ने ठाउँसमेत थिएन । तर पार्टी का विभिन्न बैठक तथा निर्णहरुले गर्दानेताहरु साढे पाँच बजे मात्र राष्ट्रिय सभागृह पुगेका थिए । 

नेताहरुको सम्बोधन

करिब ६ बजे विघटित नेकपा एमाले र माओवादी केन्द्रका दुई अध्यक्ष हात हल्लाउँदै सभा हलमा प्रवेश गरे । 

नेपाल कम्युनिष्ट पार्टी दल दर्ताको निवेदन निर्वाचन आयोगमा दिएर ओली र प्रचण्ड सभाहल पुगेका थिए । कार्यक्रमको सञ्चालन विष्णु पौडेलले गरेका थिए । त्यसपछि जनार्दन शर्माले आफ्ना भनाइ राखे । त्यसपछि माधवकुमार नेपालले नेपाल कम्युनिष्ट पार्टीको ६ बुँदे घोषणा पत्र जारी गरे । त्यसपछि नेकपाका अध्यक्ष प्रचण्डले सम्बोधन गरे ।

उनले समृद्धिका लागि एकता अपरिहार्य रहेको बताए । त्यसपछि प्रधानमन्त्री एवं नेकपाका अध्यक्ष केपी ओलीले भनाइ राखे । उनले एकीकृत भएको पार्टी टेम्पु नभएर जेट विमान भएको भन्दै ठूलो विमानमा दुई वटा पाइलट हुने बताए । उनले दुई जना मिलेर सल्लाह गरेर पार्टी सञ्चालन गर्ने बताए ।

बालुवाटारमा पार्टी

विहान देखि व्यस्त बनेको बालुवाटार बिहीवार राति सम्म व्यस्त बन्ने भएको छ । विहान बैठक र कुदाकुदका कारण व्यस्त देखिएको बालुवाटार साँझ पर्नासाथ झकिझकाउँ देखिएको हो । बालुवाटारमा रुखरुमा झिलिमिलि बत्ती जडान गरिएको छ । 

बालुवाटारमा पार्टी एकताको भोजको आयोजना गरिएको छ । जहाँ एकीकृत पार्टीका केन्द्रीय सदस्यहरुलाई तथा पार्टी नेतालाई भनेर करिब ६ जनाको लागि खाना पाकेको छ ।