काठमाडौं।चिकित्सा क्षेत्र सुधारको माग राखेर अनशन बसेका डा. गोविन्द केसीले उपत्यकामा १० वर्ष मेडिकल कलेज खोल्न प्रतिबन्धसहितको नौबुँदे सहमतिपछि २७औं दिनमा अनशन तोडेका छन् ।
सरकारी वार्ता टोली र केसीका प्रतिनिधिबीच विगत तीन दिनदेखिको लगातार छलफलसँगै बिहीबार राति १० बजेर २० मिनेटमा नौबुँदे सहमतिपत्रमा हस्ताक्षर भएको हो ।

सरकार र केसीबीचको सहमतिपछि नेपाल कम्युनिस्ट पार्टी (ने क पा) संसदीय दलका उपनेता सुवासचन्द्र नेम्वाङ र केदारभक्त माथेमाले बिहीबार राति साढे १० बजे जुस पिलाएर केसीको अनशन तोडाएका थिए । सहमतिको वातावरण बनाउन नेम्वाङले महŒवपूर्ण भूमिका निभाउँदै आएका थिए ।
यो सहमतिसँगै काठमाडौं, ललितपुर र भक्तपुरमा १० वर्ष मेडिकल कलेज खोल्न नपाइने भएको छ । संसद्मा पेस भएको विधेयकको दफा १२ मा उपदफा २ थप गरेर यस्तो व्यवस्था गर्न सरकार सहमत भएको हो । यसअघि आशयपत्र प्राप्त गरी पूर्वाधार पूरा गरेका शिक्षण संस्थाले सरकारलाई सम्पत्ति हस्तान्तरण गर्न चाहेमा सरकारले उचित मुआब्जा दिई स्वामित्व ग्रहण गर्ने सहमति पनि भएको छ । त्यस्तै, उनीहरूलाई उपत्यकामा बाहिर जान पनि सुविधा दिइने भएको छ ।
सरकार र केसीबीचको सहमतिअनुसार मेडिकल कलेज सञ्चालन गर्न तीन वर्षसम्म आफ्नै अस्पताल पूर्ण रूपमा सञ्चालन गरेको समेत हुनुपर्ने भएको छ । ऐन प्रारम्भ हुनुअगावै आशयपत्र पाइसकेको भएमा सर्त तोकिएको अवधिभित्र पूरा नगरेमा त्यस्ता शिक्षण संस्थाको आशयपत्रसमेत नवीकरण नगरिने सहमति भएको छ । राजधानी दैनिकमा खबर छापिएकाे छ ।