विराटनगर – मोरङको लेटाङ नगरपालिकाको जाँतेस्थित श्री माध्यमिक विद्यालयको खानेपानी ट्यांकीमा अज्ञात व्यक्तिले विष मिसाइ दिँदा २० जना विद्यार्थी बिरामी परेका छन् भने २ जनाको अवस्था गम्भीर रहेको छ ।

मंगलवार बिहान विद्यालय आएका विद्यार्थी पानी खाएपछि बिरामी परेका थिए । प्रावि तहका बालबालिकाले पानी खाएपनि थाहा नपाएको र माविका विद्यार्थीले गन्ध आएको थाहा पाएपछि घटना बाहिर आएको थियो । 

विद्यार्थी पानी खाने बित्तिकै किन बिरामी परे भनेर सोधीखोजी भएको थियो । तर, केही विषादी गन्हाएको थाहा पाएपछि बिरामीलाई तत्काल उपचारको लागि उपस्वास्थ्य चौकी पठाइएको थियो । पानीमा विष कसले हाल्यो भन्ने बारेमा केही नखुलेको जिल्ला प्रहरी कार्यालय मोरङका प्रहरी उपरीक्षक मनोज केसीले जानकारी दिए । 

पानीमा साइपर मेथिन १० विषादी मिसाइएको पाइएको प्रहरीले जनाएको छ । प्रहरी चौकी जाँतेका सहायक प्रहरी निरीक्षक (असई) हरीनारायण राजवंशीले कक्षा १ देखि १० सम्मकै २० जना विद्यार्थी बिरामी भएकोमा २ जनाको अवस्था गम्भीर रहेको जानकारी दिए । 

गम्भीर बिरामी भएकामध्ये २ जना सृष्टी निरौला र खुस्बु मिश्रलाई थप उपचारको लागि विराटनगर पठाइएको उनले बताए । अन्य बिरामी १८ जनाको मंगलवारे उपस्वास्थ्य चौकी उर्लावारीमा उपचार भइरहेको छ । टाढाबाट विद्यालय आएका विद्यार्थी शुरूमै पानी खाने बित्तिकै बिरामी परेका थिए ।

विषादी हानिकारक 

विद्यालयको पानी ट्यांकीमा मिसाइएको साईपर मेथिन १० विषादी हानिकारक विष भएको विज्ञले बताएका छन् । विषादी विशेषत खेती र बालीमा किरा मार्न प्रयोग गरिने विषादी भएकाले हानिकारक रहेको बाली रोग विशेषज्ञ सागर भट्टराईले जानकारी दिए । 

‘यो विष हो । विभिन्न खेती प्रयोजनमा प्रयोग गरिन्छ । यो निकै कडा विष तर चाँडै खण्डित हुने भएकाले यसको ७ दिन वेटिङ पिरियड हुन्छ,’ उनले भने, ‘यो सिन्थेटिक पाइरीफ्लोराइड विषादी हो ।’ 

विष मान्छेसम्म आइपुग्दा पानी र विषको तालमेल नमिल्न पनि सक्ने उनले बताए । ‘यसमा पानीको मात्रा थपघट हुँदा विषादीको प्रभावकारीता पनि थपघट हुन्छ । ठूलो पानीको भोल्युममा थोरै विष मिसाइएको हो भने मान्छे बाँच्ने सम्भावना बढी हुन्छ,’ उनले भने, ‘यदि विषादीको पानीमा हाल्नुपर्ने मात्रा मिलेको अवस्थामा यो विषदी घातक हुन्छ ।’