२३ असार २०८३, मंगलबार
काठमाडौं– सर्वोच्च अदालतले प्रहरी हिरासतमा रहेका नेत्रबिक्रम चन्द्र (विप्लव) नेतृत्वको नेकपाका केन्द्रीय प्रवक्ता तथा पूर्व मन्त्री खड्गबहादुर विश्वकर्मा (प्रकाण्ड)लाई २४ घण्टाभित्र अदालतमा उपस्थित गराउन आदेश जारी गरेको छ ।
वीरेन्द्र विश्वकर्माले दिएको बन्दी प्रत्यक्षीकरणको रिटमा सुनुवाइ गर्दै आइतवार सर्वोच्च अदालतका न्यायाधीश ईश्वरप्रसाद खतिवडाको इजलाशले प्रकाण्डलाई सशरीर अदालतमा उपस्थित गराउन आदेश दिएको हो ।
सर्वोच्चले बन्दी प्रत्यक्षीकरणको आदेश जारी किन हुनुनपर्ने हो भनेर प्रमाणसहित अदालतमा उपस्थित गराउन आदेश जारी गरेको छ ।
अवैध चन्दा असुलीको आरोपमा गत साउन २२ गते काठमाडौंको चाल्नाखेलबाट पक्राउ परेका प्रकाण्डलाई सर्वोच्च अदालतले शुक्रवार रिहा गर्न आदेश जारी गरेको थियो ।
सर्वोच्चको आदेशानुसार रिहा भएका प्रकाण्डलाई प्रहरीले सोही दिन अदालत बाहिरबाट पक्राउ गरेको थियो । प्रहरीले उनीमाथि काभ्रेको क्रसर उद्योगमा आगजनी गरेको अभियोगमा मुद्दा चलाएको छ ।
