०४ साउन २०८३, सोमबार
काठमाडौं – एसीसी एसिया कप छनोट प्रतियोगिताअन्तर्गत युएईसँगको खेलमा पनि नेपालले कमजोर प्रदर्शन गरेको छ ।
२ सय ५५ रनको विजयी लक्ष्य पछ्याएको नेपालले ९ ओभरमा ३३ रन जोड्दा २ विकेट गुमाइसकेको छ ।
कप्तान पारस खड्का १६ र उपकप्तान ज्ञानेन्द्र मल्ल ४ रन जोडेर आउट भएका छन् ।
यसअघि टस हारेर पहिले ब्याटिङको निम्तो पाएको युएईले निर्धारित ५० ओभरमा ९ विकेट गुमाएर २ सय ५४ रन जोडेको थियो ।
त्यसक्रममा युएईका चिराग सुरीले सर्वाधिक ६५ तथा अस्फाक अहमेदले ४५ रनको योगदान गरे ।
नेपालका लागि सन्दीप लामिछानेले ४ विकेट लिए । १० ओभर बलिङ गर्दा २ मेडन राखेका लामिछानेले २४ रन मात्र खर्चिए ।
लामिछानेका अलावा वसन्त रेग्मी र सोमपाल कामीले समान २/२ विकेट हात पारे ।
आफ्नो पहिलो खेलमा युएईले सिंगापुरलाई पराजित गर्दा नेपालले ओमानसँग हार बेहोरेको थियो ।
प्रतियोगितामा नेपाल र युएईसँगै ओमान, हङकङ, सिंगापुर र मलेसिया सहभागी छन् ।
प्रतियोगिता जित्ने टोलीले भारत, पाकिस्तान, श्रीलंका, बंगलादेश र अफगानिस्तानसँगै एसिया कप खेल्ने मौका पाउने छ ।
