काठमाडौं– इरानमा नैतिकता सिकाउने प्रहरीले १४ बर्षीया एक किशोरीलाई फाटेको जिन्स लगाएको निहुँमा कुटपिट गरी पक्राउ गरेको छ ।
नाम बताउन नचाहने उक्त किशोरी आफ्नो जन्मदिनको अवसरमा साथीहरुसँगै बसिरहेको समयमा प्रहरीले पक्राउ गरेको थियो । जन्मदिन मनाइरहेका उनीसँगै बसिरहेका अन्य साथीहरुलाई समेत प्रहरीले तान्दै भ्यानभित्र हालेर लगेका थिए ।
इरानको दक्षिण पश्चिमस्थित सिराज शहरमा उनी आफ्ना साथीहरुसँगै जन्मदिनको अवसरमा पार्टी मनाइरहेका थिए ।
ती युवतीहरुलाई अव आइन्दा इरानको पोशाक नीति विपरीत फाटेका जिन्स पाइन्ट नलगाउने शर्तमा हस्ताक्षर पछि हिरासत मुक्त गरिएको थियो ।
इन्डिपेनडेन्ट समाचारलाई ती युवतीले भनिन् ‘ ठूलो प्रहरी भ्यानभित्र दुई महिला र एक पुरुष प्रहरीले म सहित साथीहरुलाई कुटपिट गर्दै भ्यानमा हालेर लगेका थिए । ’
‘प्रहरीकोे विरोध केवल फाटेको जिन्स पाइन्ट लगाएको बाहेक अरु कुनै थिएन’ उनले भनिन् ।
पक्राउ परेकी युवतीकी आमाले वेभसाइटमा लेखेकी छिन् ‘ यो पत्याउनै गाह्रो एक घटना हो जब म प्रहरी हिरासतमा आफ्नी छोरीलाई भेट्न गएँ तब प्रहरीले छोरी बच्ची नभएको भन्दै उनले इरानी पोशाक नियमको उल्लंघन गरेको बताएका थिए । ’
‘प्रहरीेले हिरासतमा लिएर कुटेको निलडाम मेरो छोरीको जिउमा अहिलेसम्म पनि छ’ युवतीकी आमाले भनिन् । आफ्नी छोरीले फाटेको जिन्स बाहेक अरु सही पोशाक लगाएको समेत उनले दावी गरिन् ।
इरानमा सन १९७९ को इस्लामिक क्रान्तिपछि महिलाहरुले सार्वजनिक स्थलहरुमा कालो बुर्खा लगाउनुपर्ने कडा नियम लागू भएको थियो । यस नियमको इरानमा चर्को रुपमा विरोध भइरहेको छ ।
एजेन्सी
