काठमाडौं — अमेरिकाको क्यालिफोर्नियामा एक बन्दूकधारीले आफ्नी पत्नी लगायत पाँच व्यक्तिलाई गोली हानेर मारेपछि आत्महत्या गरेको अधिकारीहरूले बताएका छन् । 

बुधवार लस एन्जेलसबाट उत्तरतर्फ रहेको बेकर्सफील्डस्थित एक घर र कार्यालयमा भएको उक्त गोलीकाण्ड के कारणले भएको हो भन्ने प्रस्ट छैन । 

‘यो जथाभावी गरिएको गोलीप्रहार हैन,’ कर्न काउन्टी शेरिफ डनी योङब्लडले केरो–टीभीलाई बताए । ६ मानिस छोटो अवधिमा मारिएको उनको भनाइ छ ।

बन्दूकधारी शुरूमा आफ्नी पत्नीसँग ट्रककाृ डिपो भएको ठाउँमा साँझ साढे पाँच बजे आएका थिए र अर्को मान्छेसँग भिडेका थिए । 

‘आरोपित पतिले ट्रक कम्पनीका मानिसलाई गोली हाने अनि त्यसपछि पत्नीलाई गोली प्रहार गरे,’ योङब्लडले भने, ‘त्यसपछि उनले त्यहाँ आइपुगेका अर्का मानिसलाई लखेटेर गोली हाने ।’

त्यसपछि बन्दूकधारी एउटा घरमा गए र दुईजनालाई गोली हाने, शेरिफले बताए । 

त्यसपछि उनले बच्चा राखेर गाडी चलाइरहेकी एक महिलाको कार अपहरण गरे । महिला र बच्चा भागेपछि ती मानिस राजमार्गतर्फ गए जहाँ शेरिफका सहायकले उनलाई देखे, योङब्लडले भने । 

बन्दूकधारीले सहायकलाई देखेपछि पार्किङ लटमा गाडी रोके । सहायकले उनलाई बन्दूक देखाएर सामना गर्दा उनले आफैंलाई छातीमा गोली हाने, शेरिफले बताए । 

ती बन्दूकधारीको पहिचान सार्वजनिक गरिएको छैन । 

करीब ३० जनाले गोलीप्रहार देखेको र तिनीहरूलाई सहायकहरूले सोधपुछ गरिरहेको योङब्लडले बताए ।

द गार्डियनबाट