काठमाडौं – सार्वजनिक यातायातको भाडा १० प्रतिशतले वृद्धि भएसँगै व्यवसायीहरूले दशैंका लागि अग्रिम टिकट बुकिङ खुला गर्ने तयारी गरेका छन् ।

नेपाल यातायात व्यवसायी राष्ट्रिय महासंघले मंगलबारदेखि दशैंमा काठमाडौंबाट घर जाने यात्रुहरूका लागि अग्रिम टिकट बुकिङ खोल्ने तयारी गरेको हो ।

यातायात व्यवस्था विभागले शनिवार सार्वजनिक यातायातको भाडा १० प्रतिशतले वृद्धि गर्ने निर्णय गरे पनि व्यवसायीहरूले आधिकाकि पत्र नपाएको भन्दै सोमवार मात्रै टुंगो लाग्ने बताएका छन् ।

महासंघका महासचिव सरोज सिटौलाले सरकारको आधिकारिक चिट्ठी पाएपछि बैठक बसेर अग्रिम टिकट खोल्ने बताए ।

उनले भने, ‘लामो समयदेखि नबढेको भाढा बढेको भन्ने सुनेका छौं, सम्भावतः आज आधिकारिक चिट्ठी पाउँछौं, सोमबार हामी बैठक बसेर टुंगो लगाउछौं ।’ मंगलबारदेखि बुकिङ खुल्ने उनको संकेत ।

व्यवसायीहरूले पटक–पटक पेट्रोलियम पदार्थको मूल्य वृद्धि भएपनि यातायातको भाडा नबढाएको भन्दै बुकिङ खोल्न असहमति जनाएका थिए । 

सरकारले भने दशैंको मुखमा भाडा बढाउँदा सरकार र व्यवसायी दुवैका लागि राम्रो नहुने भन्दै यसमा सहमति जनाएको थिएन । अन्तत: व्यवसायीहरूको अडानसामु सरकारको केही लागेन ।

एक महिनामा दुई पटक गरेर डिजेलमा प्रतिलिटर ६ रुपैयाँ वृद्धि भएपछि महासंघले बस भाडा वृद्धि गर्न वा डिजेलमा गरिएको मूल्य वृद्धि फिर्ता लिन ४८ घण्टे अल्टिमेटम दिएको थियो ।

वृद्धि भएको भाडा आइतवार (७ असोज) बाट लागू भएको छ  । २०७२ सालपछि यातायात भाडा वृद्धि भएको थिएन ।