२८ जेठ २०८३, बिहीबार
काठमाडौं– महानगरीय प्रहरी परिसर अन्तर्गतका प्रहरी बृत्त र प्रभागमा कार्यरत १० जना प्रहरी अधिकारीविरुद्ध घुस मागेको आरोप लागेको छ ।
पछिल्लो समय प्रहरी कर्मचारीहरु घुससहित पक्राउ पर्ने क्रम बढेपछि प्रहरीले आन्तरिक रुपमा सूचना लिने अभियान थालेपछि १० जनाविरुद्ध सेवाग्राहीबाट घुस लिनेगरेकाे आरोप लागेको हो ।
महानगरीय प्रहरी परिसरले सेवाग्राही र व्यापारीसँग पैसा असुल्ने प्रहरीको विवरण संकलन गर्न छुट्टै टोली नै परिचालन गरेको छ ।
महानगरीय प्रहरी परिसर काठमाडौंका प्रमुख प्रहरी बरिष्ठ उपरीक्षक (एसएसपी) बसन्त लामाले मातहतका कर्मचारीले सेवाग्राहीबाट रकम लिने गरेको आरोप आएपछि अनुसन्धान थालिएको बताए ।
‘सेवाग्राहीले प्रभावकारी रुपमा सेवा नपाएको र केही ठाउँमा अनधिकृत रुपमा रकम माग भएको भन्ने सूचना पनि आएको छ,’ एसएसपी लामाले लोकान्तरसँग भने, ‘यस विषयमा बुझ्न अहिले आन्तरिक अनुसन्धान गरिरहेका छौं ।’
एसएसपी लामाले व्यापारी र सेवाग्राहीबाट घुस लिने भनेर आरोपित प्रहरी अधिकारीमाथि निगरानी गर्न विशेष टोली नै बनाएका छन् ।
उक्त टोलीले मातहतका प्रहरी अधिकारीको निगरानी गरेर एसएसपी लामालाई रिपोर्ट गर्ने गर्छ ।
कमलपोखरीका असईमाथि अनुसन्धान
महानगरीय प्रहरी परिसर काठमाडौंले प्रहरी बृत्त कमलपोखरीमा कार्यरत प्रहरी नायव निरीक्षक (सई)माथि घुस लिएको आरोप लागेपछि अनुसन्धान अगाडि बढाएको छ ।
कमलपोखरीको मुद्दा शाखामा कार्यरत सईले सेवाग्राहीबाट घुस लिएको सूचना आएपछि अनुसन्धान थालिएको एसएसपी लामाले बताए ।
स्रोतका अनुसार कमलपोखरीका सईले सोमवार दिउँसो एक सेवाग्राहीबाट १० हजार रुपैयाँ घुस मागेको सूचना परिसरमा पुगेको थियो । सोही सूचनाको आधारमा परिसरको विशेष टोलीले सईको कार्यकक्षमा खानतलासी समेत गरेको थियो ।
तर उनको साथबाट ४ हजार रुपैयाँ मात्रै फेला परेको स्रोतको भनाइ छ । उक्त पैसा उनले आफूले आफ्नै बैंक खाताबाट एटीएममार्फत झिकेको बताएका छन् ।
उनीमाथि थप अनुसन्धानका लागि सोमवार साँझै परिसर झिकाइएको प्रहरी स्रोतले जानकारी दियो ।
