सुर्खेत– अहिलेका युवाहरूमा अध्ययन गरिसकेपछि जागिर खोज्ने बानी नै परेको छ । अधिकांश युवाहरू अध्ययन सकेर खाडी मुलुकमा जागिर खोज्न लाइन लागिरहेका बेला दैलेखका एक युवाले उदाहरणीय कार्य गरेका छन् ।

स्थायी घर दैलेख भएका युवा राजेन्द्र विष्टले वायो केमेष्ट्री अध्ययन गरेर वीरेन्द्रनगरको वडा नं. ६ मा सुर्खेत वायोकेमिकल एण्ड हाइजेनिक इण्डष्ट्रीको स्थापना गरी विभिन्न सरसफाइका लागि केमिकल पदार्थहरू उत्पादन गर्दै आइरहेका छन् । उनको उद्योगमा ट्वाइलेट क्लिनर, ग्लास क्लिनर, वाईक र कार वास क्लिनर, ह्याण्ड वास, डिस वास, हरपिकजस्ता केमिकलहरु उत्पादन गरिँदै आइएको छ । 

हाल उनको उद्योगमा ९ जना कार्यरत रहेका छन् । चामुण्डा विन्द्रासैनी वडा नं. ६, सिरौल स्थायी घर भएका राजेन्द्र विष्टले वायो केमेष्ट्रीमा एमएसी गरेका छन । उनले भारतको देहरादुन स्थिति एचएमवी गढवाल केन्द्रीय विश्वविद्यालयबाट मास्टर्स गरेका हुन् । २०१६ मार्चमा स्थापना गरिएको उनको कम्पनीबाट उत्पादित सामाग्रीहरू कर्णाली प्रदेशभरी र पाँच नम्बर प्रदेशको बुटवलसम्म पुग्ने गरेको छ ।

उनको व्यापार मासिक रुपमा पाँच लाख रुपैयाँभन्दा बढिको हुने गरेको छ । सो रकम मध्ये सबै घटाएर उनको मुनाफा ६० हजार रुपैयाँ  छ । उनलाई भारतबाट आयात गरिएको केमिकलहरुसँग प्रतिस्पर्धा गर्न सजिलो लाग्छ । किनभने उनीहरुले क्वालीटि मेन्टेन गरेका हुन्छन् । 

तर, काठमाडौं र वीरगंजबाट आउने केमिकलहरु न क्वालीटिका हुने, न त दर्ता भएर बनाइएको हुने हुँदा यहाँका पसलमा सस्तोमा दिने हुँदा कहिलेकाँही आफूलाई अलिकति गाह्रो हुने गरेको अनुभव उनले लोकान्तरसँग सुनाए । यसअघि भारतबाट मात्रै आयात हुने गरेका ती सामाग्रीहरूलाई सभिन व्राण्डले विस्थापित गर्दै गइरहेको छ ।

उनले नेपाली उपभोक्ताहरुले नेपालमै बनेको गुणस्तरीय सामाग्रीहरु प्रयोग गर्ने क्रम बढेको आफूले पाएको बताए । ‘शुरु शुरुमा हाम्रो उत्पादनहरू बजारमा विक्री गर्न अलि असहज नै हुने गरेको थियो ।’ उनले भने, ‘तर अहिले कर्णालीका र बुटवलका व्यापारी र उपभोक्ताले हाम्रो व्राण्ड नै खोज्ने गरेका छन् ।’ उनले नेपाली सामाग्री प्रयोग गरेको खण्डमा देशकै ढुकुटी बलियो हुने भन्दै सस्तो र गुणस्तर नभएका सामाग्रीले सबैलाई क्षति पुयाउने बताए ।

सुरुवातमा रु नौ लाख रकम लगानी गरेका विष्टले अहिलेसम्म आइपुग्दा रु ४० लाखभन्दा बढीको लगानी गरिसकेका छन् । उनको उद्योगले दैनिक रुपमा १५ सय लिटर केमिकल उत्पादन गर्ने गरेको छ । उनको कम्पनीले उत्पादन गरेका केमिकलहरूको मूल्य भारतबाट आयात गरिएकोभन्दा ३५ प्रतिशत सस्तो छ । 

भारतबाट आयात गरिएको हरपिक (ट्वाईलेट क्लिनर) रु १३० पर्छ भने सभिन व्राण्डको त्यहि गुणस्तरको हरपिक किन्दा १०० रुपैयाँ पर्ने गरेको छ । ‘हरेक सामानमा हामीले कम मूल्य राखेका छौं ।’ उनले भने, ‘त्यसैले पनि हामीले गुणस्तर कायम राख्दै बजार बढाउँदे लिएका छौं ।’ उनले यस्तै उद्योग बुटवल र काठमाडौंमा खोल्ने तयारी गरेको बताए ।

‘देशैभरी सभिन व्राण्डलाई स्थापित गर्ने योजनाका साथ नेपालका अन्य स्थानमा पनि उद्योग खोल्ने योजना बनाएको छु ।’ लोकान्तरसँग कुराकानी गर्दै सञ्चालक विष्टले भने, ‘देशैभरमा केमिकलमा सुभिन व्राण्डले स्थान लेओस र अन्य देशबाट आयात गर्न नपरोस भन्ने मेरो मुख्य चाहना हो ।’

शुरुमा ६ वर्ष  वीरेन्द्रनगरमा विभिन्न विद्यालयमा विज्ञान विषय अध्यापन गराएका उनले आफूले सिकेको सीप अनुरुप नै काम गर्दा बढी फाइदा हुने देखे । ‘विज्ञान विषय लिइ मास्टर्स गरेकाहरू पनि लोकसेवाको खरिदार र सुब्बामा जागिर खान लाइन लागेको मैले देखें ।’ उनले भने, ‘या त उनीहरु कुनै राजनीतिक दलको पछि लागेर शिक्षण संस्थामा जागिर खानको लागि लाइन लागेको देखें ।’ उक्त लाइन देख्दा र सबैको पहुँच नभएका कारण विदेश गएको पनि देखेका उनले आफैंले केहि गर्ने निष्कर्षमा पुगेको बताए । 

‘मैले अरुले जस्तै गरि जागिर खानु भन्दा अरुलाई जागिर खुवाउने सपना देख्न थालें ।’ उनले भने, ‘त्यहि सपनाका कारण आज म यहाँ आएको छु । म देशका लागि केहि गर्न चाहनछु ।’