३० जेठ २०८३, शनिबार
काठमाडौं–जापानमा बालबालिकाहरुको आत्महत्या दर तीस वर्ष यताकै उच्च रहेको त्यहाँको शिक्षा मन्त्रालयले रिपोर्ट सार्वजनिक गरेको छ ।
यो रिपोर्ट केही अघिको हो । आर्थिक वर्ष २०१६÷१७ को मार्चसम्म आधारभूत कक्षादेखि हाई स्कुल पढ्ने उमेर सम्मका २५० वालबालिकाहरुले आफ्नो जीवन आफैले लिए ।
उक्त संख्या अघिल्लो वर्षको भन्दा ५ जना धेरै र सन् १९८६ यताको सबैभन्दा उच्च हो ।
बालबालिकाले भोगेका प्रमुख अप्ठ्यारोहरुमा पारिवारिक समस्या, भविष्यको चिन्ता र आफ्ना साथी संगीबाट हुने हेपाहा व्यवहारहरु रहेका छन् ।
तर, स्कुलहरुले बताए अनुसार दर्ता भएका मृत्युमध्ये १ सय ४० बालबालिकाको आत्महत्याको कारण अज्ञात रहेको छ । त्यी घटनामा विद्यार्थीहरुले सुसाइट नोटनै छाडेका थिएनन् ।
आफ्नो ज्यान लिने अधिकांश हाई स्कूलमा अध्ययन गर्ने उमेर समूहका थिए । जापानमा १८ वर्षसम्म उमेरका बालबालिकाहरुले हाई स्कुल पढ्छन् ।
सन् २०१५ मा पनि जापानको मन्त्रिपरिषद कार्यालयले सन् १९७२–२०१३ बीचमा बालबालिकाको आत्महत्याको तथ्यांक सार्वजनिक गरेको थियो । त्यसमा सेप्टेम्बर १ मा स्कुलको दोस्रो सत्र भएपछि आत्महत्याको दर बढेको देखाँउछ ।
सन् २०१५ मा जापानमा विश्वको सबैभन्दा ठूलो आत्महत्या दर रहेको थियो । विश्व स्थास्थ संगठनका अनुसार निरोधात्मक उपायहरु लागु गरिएपछि त्यो संख्या घटेको छ ।
प्रहरीले बताएअनुसार जापानको समग्र आत्महत्या सन् २०१७ मा २१,००० मा झर्यो । यो दर सन् २००३ मा ३४ हजार थियो ।
समग्र आत्महत्या दर घटेको भए पनि बालबालिकाको आत्महत्या दर भने तुलनात्मक रुपमा उच्चनै रहिरहेको छ । उच्च आत्महत्या दरले गर्दा आत्महत्या जापानमा बालबालिकाहरुको मृत्युको प्रमुख कारण बनेको छ ।
“विद्यार्थीको आत्महत्याको संख्या उच्च रहेको छ । यो डरलाग्दो अवस्थालाई छिटो भन्दा छिटो सम्बोधन गरिनुपर्छ ,” शिक्षा मन्त्रालयका अधिकारी नोरियाकी किताजाकीले अन्तिम तथ्यांक सार्वजनिक गर्ने क्रममा भने ।
–बीबीसी
