नेपाली कांग्रेसमा पछिल्लो सयम हिन्दू राष्ट्रको मुद्दा पेचिलो बन्दै जान थालेको छ । कांग्रेसमा हिन्दू राष्ट्रको मुद्दा पेचिलो बन्दै गइरहेको तथ्य कांग्रेस महामन्त्री डा शंशाक कोइरालाले सार्वजनिक समारोहमा व्यक्त गरेको अभिव्क्तिबाट पनि प्रष्ट हुन्छ । उनले सार्वजनिक कार्यक्रमहरुमा नै हिन्दू राष्ट्रको पक्षमा खुलेर अभिव्यक्ति दिएका छन् । 

महामन्त्री डा. कोइरालाले सोमबार भरतपुरमा गणेश धामनिर्माणर्थ आयोजित बृहत महायज्ञमा बोल्दै नेपाल हिन्दूराष्ट्र हुनुपर्ने बताएका छन् । उनले यसका लागि जनमत संग्रह गर्नुपर्ने उल्लखे गरेका छन् । 

संविधान विपरित हिन्दूराष्ट्र पुनस्थापनाको कुरा गरेको भन्दै केन्द्रीय समितिको बैठकमा महामन्त्री कोइरालाको आलोचना पनि भयो । तर पनि उनले संविधानबाट धर्मनिरपेक्ष शब्द हटाउनु पर्ने र हिन्दूराष्ट्र कायम गर्नुपर्ने आवाज उठाउन छाडेका छैनन् । आगामी महाधिवेशनमा पार्टी सभापतिका लागि उम्मेदवारी दिने संकेत गरेका कोइरालाले हिन्दूधर्मको पक्षमा लिएको अडानलाई राजनीतिक रुपमा निकै अर्थपूर्ण रुपमा लिइएको छ ।

काग्रेस भित्र हिन्दूराष्ट्रको मुद्दा उठाउने व्यक्ति महामन्त्री कोइराला मात्र होइनन् । पार्टीका स्वर्गीय नेता खुमबहादुर खड्काको निधन पछि सार्वजनिक समारोहदेखि पार्टीको केन्द्रीय कार्यसमिति सम्म सशक्त ढंगले आवाज उठाउने पार्टीका केन्द्रीय सदस्य एवं पूर्व मन्त्रीशंकर भण्डारी पनि रहेका छन् । सार्वजनिक समारोह होस् या पार्टीका केन्द्रीय कार्य समिति बैठक, पूर्वमन्त्री भण्डारीले नेपाललाई हिन्दूराष्ट्र घोषणा नगर्ने हो भने मुलकको अस्तित्व नै खतरामा पर्ने तर्क अगाडि सार्दे आइरहेका छन् । 

नेपाललाई हिन्दूराष्ट्र नबनाउने सनातनदेखि चलिआएको नेपाली धर्म,सस्कृति र रीति रिवाजमाथि ठूलो प्रहार हुने र  अन्ततः नेपाली राष्ट्रियता माथि नै प्रहार हुने पूर्व मन्त्री भण्डारीको तर्क छ । त्यसमा पनि पछिल्लो समय त हिन्दू धर्मलाई सिध्याउनका लागि सरकार समेत मतियार बनेको पूर्वमन्त्री भण्डारीको ठम्याई रहेको छ । त्यसकारण हिन्दु धर्मको मुद्दालाई काग्रेसले आगामी महासमिति बैठकमा कुनै पनिहालतमा व्यूताउँनुपर्ने भण्डारीको तर्क रहेको छ ।

हिन्दू धर्मको मुद्दाको विषयमा पार्टीका महामन्त्री कोइराला,केन्द्रीय सदस्यएवं पूर्वमन्त्री भण्डारीले मात्र होइन अन्य नेता कार्यकर्ताहरुले पनि नेपाली कांग्रेसले हिन्दूत्वको मुद्दा उठाउनुपर्ने बताउने गरेका छन् । 

नेपाललाई हिन्दू राष्ट्र बनाउनुपर्ने आवाज सशक्त ढंगले उठाउने महामन्त्री कोइराला, भण्डारीमात्र होइनन् । कयौं नेता कार्यकर्ताले नेपाललाई हिन्दूराष्ट्र बनाउनु पर्ने मत राख्छन् तर खुलेर बोल्न सक्ने अवस्थामा भने उनीहरु देखिएका छैनन् । 

नेपाली कांग्रेसकै शीर्ष नेताहरुको हकमा हेर्ने हो भने काग्रेस वरिष्ठ नेता रामचन्द्र पौडेलले केही समय अगाडि छिमेकी भारतको प्रसिद्ध हिन्दु धर्मसँग सम्बन्धित धार्मिक स्थलहरुको यात्रा गरेका छन् । त्यहाँ उने पूजाअर्चनादेखि धार्मिक अुनष्ठानहरु गरेका छन् । 

यद्यपी वरिष्ठ नेता पौडेलले हिन्दू राष्ट्रको पक्षमा खुलेर अभिव्यक्ति भने सार्वजनिक गरेका छैनन् । 

तै पनि हिन्दु धर्मसँग सम्बन्धित धार्मिक स्थल र हिन्दु धर्म गुरुहरुसंगको भेटघाटबाट के स्पष्ट हुन्छ भने वरिष्ठ नेता पौडेल पनि नेपाललाई हिन्दूराष्ट्र बनाउनु पर्छ भन्ने मानसकितामा छन् । तर त्रासका कारण नेत ापौडेलले हिन्दूराष्ट्रको पक्षमा खुलेका छैनन् । 

काग्रेसका सभापति शेरबहादुर देउवासहित वरिष्ठ नेता पौडेल लगायतका नेता तथा कार्यकर्ताहरु नेपाललाई हिन्दूराष्ट्र बनाउन पर्छ भन्ने अवस्थामा केही समयभित्र आउने छन् । त्यसपछि हिन्दूराष्ट्रको पक्षमा माहोल बनाउन नेपाली कांग्रेसले सडकमा आन्दोलनको नेतृत्व प्रदान गर्नेछ । 

हिन्दूधर्म र नेपाली राजनीतिको पाटोलाई नजिकबाट नियालेर हेर्ने हो भने  विगतदेखि नै हिन्दूधर्मको मुद्दालाई कमल थापा नेतृत्वको राप्रपा नेपालले उठाइरहेको छ । जुन मुद्दा काग्रेसले उठाउँदै गर्दा काग्रेस राप्रपा नेपालको पिछलग्गु भएको जस्तो देखिन्छ । जसका कारण यो मुद्दालाई कांग्रेसको शीर्ष नेतृत्वले सशक्त ढंगले उठाउन डराइरहेको अवस्था छ । 

शुक्रवार देखि कांग्रेसको महासमिति बैठक बस्दैँछ । काग्रेसको महासमिति बैठकमा यो मुद्दा पेचिलो मुद्दा बन्ने धेरैको अनुमान छ । नेपाललाई हिन्दूराष्ट्र बनाउनु पर्छ भनि कांग्रेस महामन्त्री डा. कोइरालाले उठाएको मुद्दाले काग्रेसको महासमिति बैठकमा कुन स्थान पाउँछ त्यो थाहा पाउनलाई महासमिति बैठकलाई नै कुर्नु पर्ने छ ।