०६ साउन २०८३, बुधबार
काठमाडौँ– प्रमुख प्रतिपक्षी दल नेपाली कांग्रेसको हिजोबाट शुरु महासमिति बैठकमा आजबाट बन्दसत्र शुरु भएको छ । जारी वन्दसत्रमा महामन्त्री शशांक कोइरालाले सांगठनिक प्रतिवेदन प्रस्तुत गरेका छन् ।
प्रतिवेदनमा चुनावी हारलाई शक्तिमा परिणत गर्दै आगामी दिनमा पार्टी एक नम्बर बनाउने ५ आधार समेटिएको छ । आर्थिक, कोषाध्यक्षको प्रतिवेदन र लेखा परिक्षण प्रतिवेदन पनि आजै पेस हुने छन् । सबै प्रतिवेदन पेस भएपछि समूहगत रुपमा छलफल शुरु गर्ने तयारी कांग्रेसको छ ।
सहमति नजुटेकाले विधान मस्यौदा भने आज प्रस्तुत हुने छैन । अन्य विषय केन्द्रीय समितिले अनुमोदन गरेपनि शीर्ष नेताको अडानका कारण विधान मस्यौदामा भने सहमति हुन सकेको छैन । विधान मस्यौदाबाहेक सबै प्रतिवेदन केन्द्रीय कार्यसमिति बैठकले परिमार्जनसहित पारित गरिसकेको छ ।
विधान मस्यौदामा पदाधिकारी संख्या र पदाधिकारीको निर्वाचनबारे बहस जारी छ । पेस गरिएका प्रतिवेदनमाथि छलफल गर्न महासमिति सदस्यलाई प्रदेशस्तरीय रुपमा सात समूहमा विभाजन गर्ने वा समावेशी रुपमा विभाजन गर्ने भन्नेमा सहमति जुटाउने प्रयास भइरहेको छ ।
