काठमाडौं– नेकपाका अध्यक्ष पुष्पकमल दाहाल ‘प्रचण्ड’ले प्रगतिशिल परिवर्तनलाई न्याय क्षेत्रले साथ नदिएको टिप्पणी गरेका छन् । 

तत्कालिन एमाले र माओवादी नकिटका कानून व्यवसायी संगठनको एकतापछि आयोजित कार्यक्रममा प्रचण्डले परिवर्तमा न्यायक्षेत्रको प्रभाव कम देखिएको बताएका हुन् । 

‘राजनीतिक परिवर्तनमा कार्यपालिका, न्यायपालिका र व्यवस्थापिका मध्ये सबैभन्दा कम भूमिका अदालतको हुने गरेको पाइन्छ’ प्रचण्डले भने,‘राजनीतिक परिवर्तनलाई संस्थागत गर्ने कुरामा व्यवधान देखिने गरेको छ ।’
प्रचण्डले कार्यपालिका, व्यवस्थापिका र न्यायपालिकाबीच तालमेल गर्नका लागि ध्यान दिन आवश्यक भएको बताए ।

परिवर्तनका पक्षधहरुले धेरै कुरामा ध्यान दिनु पर्ने मिहनेत र लगानी गर्नुपर्ने अवस्था आऐको प्रचण्डको भनाइ थियो । उनले न्यायको पक्षमा संगति तालमेल बन्नु पर्ने र तीन पक्षबीच हातेमाले र सहकार्य आवश्यक रहेको बताए । 

‘कहिले काही कार्यपालिका, न्यायपालिका व्यवस्थापिकाबीच तामलेल र समन्वय नभएका सन्दर्भहरु बडो नमिठा अनुभवहरु विगतमा र वर्तमानमा भोग्ने गरेका छौं’ प्रचण्डले भने,‘यो शक्ति सन्तुलन ठिक ढंगले मिलाउने कुरामा कानून व्यवसायीहरुको महत्वपूर्ण भूमिका आवश्यक छ ।’

एकीकृत भएको एनएलएले समग्र राजनीतिक परिवर्तनको अपुग विषयलाई पूरा गर्न भूमिका खेल्नुपर्ने प्रचण्डको भनाइ थियो ।