काठमाडौं, २७ फागुन - जाजरकोट बस दुर्घटनामा ज्यान गुमाउनेको संख्या शुक्रबार बिहानसम्म २६ पुगेको छ ।
बिहिबार दिउँसो जाजरकोट सदरमुकाम खलंगाबाट खारातर्फ जाँदै गरेको ना ३ ख २२७९ नम्बरको बस पासागाढ भन्ने स्थानमा भीरबाट करीब ४०० मिटर तल खसेर सो भयानक दुर्घटना भएको थियो ।
दुर्घटनामा ३६ जना घाइते भएका छन् । जिल्ला प्रहरी कार्यालय जाजरकोटका प्रहरी प्रमुख डीएसपी भावेश रिमालले दुर्घटनामा मृत्यु हुनेको संख्या २६ पुगेको लोकान्तरलाई बताए ।
उनका अनुसार घाइतेमध्ये २२ जनालाई नेपालगञ्ज पठाएको जानकारी दिँदै अरु १४ मध्ये ८ जनाको चौरजहारी अस्पताल र ६ जनाको जाजरकोट जिल्ला अस्पतालमा उपचार भइरहेको छ ।
प्रहरीका अनुसार मृत्यु हुनेमा भेरीमालिका नपा–४ का गणेश बोहोरा र नदिल चन्द, भेरीमालिका–३ का शान्त सुनार, भेरीमालिका–१० का सन्तोष चन्द, भेरीमालिका–११ का गोपाल सुनार, बहादुर भण्डारी र शर्मिला सुनार, दसेरा–१ का डिलबहादुर बुढा र दसेरा–२ का मनिराम जैसी, सिमा–९ का मदन पुन, लहँ–४ का रामबहादुर बस्नेत, साल्म–५ का नन्दलाल जैसी, पजारु–८ का नैने दमार्इं, मजकोट–७ का दले तिरुवा र रुकुम चौरजहारीका कृष्णबहादुर गिरी छन् । अन्य मृतकको सनाखत हुन बाँकी रहेको छ ।
घुमाउरो सडकमा तीब्र गतिका कारण बस दुर्घटनामा परेको अनुमान गरिएको डिएसपी रिमालले जनाएका छन् ।
चलानीमा ४३ जना मात्रै यात्रु बोकेर हिँडेको भएपनि बसले बाटोमा यात्रु थप्दै जाँदा संख्या बढेको हो ।
घटनास्थलमा पुगेका स्थानीय विकास अधिकारी रुद्र पण्डितका अनुसार घटनास्थलमा घाइते र मृतकका परिवार शोकाकुल भएका छन् ।
जाजरकोटमा वर्षायसैबीच गएरातीदेखि जाजरकोटमा वर्षा भएको छ । वर्षाका कारण उद्दारमा समस्या भएको डिएसपी रिमालले बताए ।
‘लगभग उद्दार सकिएको भएपनि हिजो उद्दारकै क्रममा रात परेकाले आज पनि त्यहाँ जानुपर्ने हुन्छ । वर्षाका कारण जान समस्या भइरहेको छ’, उनले भने ।
उनका अनुसार दुर्घटनास्थल जानको लागि निकै अप्ठ्यारो बाटो पार गर्दै पुग्नुपर्ने हुन्छ । सडकमाथितिर विशाल पहाड भएको र ढुंगा खसिरहने भएकाले उद्दार टोली नै दुर्घटनामा पर्न सक्ने जाखिम रहेको उनको भनाई छ ।
जसरी पनि थप उद्दारमा जुट्नुुपर्ने भएकाले आफूहरुले नेपालीसँग समन्वयन गरेर घटनास्थलमा जाने प्रयास गरिरहेको बताए ।
अहिले पनि जाजरकोटमा वर्षा रोकिएको छैन ।
