लोकान्तर संवाददाता
काठमाडौं, २७ फागुन –खाना पकाउने एलपी ग्यासमा गरिएको मूल्यवृद्विप्रति उपभोक्ता अधिकारकर्मीहरूले आक्रोस व्यक्त गरेका छन् । नेपाल आयल निगमले शुक्रवार राती १२ बजपछि लागू हुनेगरी बढाउने निर्णय गरेको खाना पकाउने ग्यासको मूल्य फिर्ता लिन उपभोक्ता अधिकारवादी संघसंस्थाले माग गरेका हुन् ।
निगमले शनिवारदेखि खाना पकाउने ग्यासमा प्रतिसिलिण्डर २५ रुपैयाँ मूल्यवृद्वि गर्ने निर्णय गरेको हो । शुक्रवारसम्म प्रतिसिलिण्डर १३ सय ५० रुपैयाँ पर्ने ग्यासको मूल्य शनिवारदेखि लागू हुनेगरी १३ सय ७५ रुपैयाँ पु-याइएको हो ।
‘ग्यासको मूल्य बढाउनु अत्यान्त निन्दनीय छ,’ मूल्यवृद्विप्रति विरोध जनाउँदै उपभोक्ता अधिकार अनुसन्धान मञ्चले भनेको छ, ‘उपभोक्ता अधिकारको विश्वव्यापी मान्यतालाई लत्याउँदै गरिएको मूल्यवृद्वि तुरुन्त फिर्ता गरिनुपर्छ ।’
मूल्यवृद्वि अवैज्ञानिक र अव्यवहारीक रहेको मञ्चको ठहर छ ।
उपभोक्ता अधिकार दिवसको पूर्वसन्ध्याहमा अत्यावश्यकीय वस्तुको मूल्यवृद्वि गरिएको भन्दै उक्त मूल्यवृद्वि तत्काल फिर्ता लिन मञ्चले निगम र आपूर्ति मन्त्रालयसमक्ष माग गरेको छ ।
निगमले यसअघि करीव १ महिनाअघि पनि खाना पकाउने ग्यासको मूल्य प्रतिसिलिण्डर २५ रुपैयाँले वृद्वि गरेको थियो ।
