०२ असार २०८३, मंगलबार
काठमाडौँ - प्रमुख प्रतिपक्षी दल नेपाली कांग्रेस संसदीय दलले प्रधानमन्त्री केपी शर्मा ओलीले संसदको गरिमा घटाएको भन्दै आपत्ति जनाएको छ ।
नेपाल सरकारको वार्षिक नीति तथा कार्यक्रममाथि छलफलपश्चात सांसदहरूले प्रधानमन्त्रीलाई सोधेको प्रश्नको जवाफ दिने क्रममा प्रधानमन्त्रीले संसदको गरिमा घटाउने, अमर्यादित र गैरसंसदीय भाषा बोलेकोप्रति नेपाली काँग्रेस संसदीय दलले गम्भीर आपत्ति जनाएको हो ।
मंगलवार साँझ संसद बैठक सकिएपछि कांग्रेस संसदीय दलका प्रमुख सचेतक बालकृष्ण खाणले एक विज्ञप्ति निकाली प्रधानमन्त्रीले बोलेका अमर्यादित शब्दहरू संसदको रेकर्डबाट तुरुन्त हटाउनुपर्ने माग गरेको छ ।
'प्रतिनिधि सभाका सम्माननीय सभामुखले गरिमामय ढंगले संसद सञ्चालन गर्नुपर्ने र गैरसंसदीय एवं संसदको गरिमा घट्ने खालका अमर्यादित शब्दहरु संसदको रेकर्डबाट तुरुन्त हटाउनुपर्नेमा नहटाइएको र संसदको गरिमाको रक्षाका लागि निर्णायक भूमिका निर्वाह गनुपर्नेमा त्यसप्रति तत्परता समेत नदेखाउनु भएकोप्रति नेपाली काँग्रेस संसदीय दलको गम्भीर ध्यानाकर्षण भएको छ,' विज्ञप्तिमा उल्लेख गरिएको छ ।
विज्ञप्तिमा कांग्रेसले संसदको गरिमामा आँच आउने खालमा यस्ता अभिलेखलाई संसदको रेकर्डबाट यथाशीघ्र हटाउन र गरिमामय ढंगले संसद सञ्चालन गर्न माग गरेको छ ।
