काठमाडौं–सत्तारुढ दल नेकपाका एक सांसदले गुठी विधेयकको विरोध गर्दै आन्दोलनरत गुठियार र सरकारबीच वार्ताको वातावरण बनाउन हस्तक्षेपकारी भूमिका खेल्न सभामुखसँग माग गरेका छन् । 

प्रतिनिधि सभाको आइतवार बसेको बैठकको शून्य समयमा नेकपाका सांसद विरोध खतिवडाले गुठी विधेयकलाई लिएर सरकार र आन्दोलनकारीले एउटै गीत गाएको भन्दै वार्ताका लागि सभामुखको हस्तक्षेपको माग गरेका हुन् । 

‘बुझ्नेले कुरा नबुझेपछि, मनमा पीर त पर्ने नै भयो... भनेर गाउँदै सरकार गालामा हात लगाएर बसेको छ । आन्दोलनकारी पनि बुझ्नेले कुरा नबुझेपछि मसाल त समात्नै पर्‍यो... भनेर गीत गाइरहेका छन्,’ खतिवडाले भने, ‘नेपालको हरेक राजनीतिक आन्दोलनमा काठमाडौं उपत्याकाका नेवार समुदायको ठूलो भूमिका छ । यो स्थिति सिर्जना कसरी भयो ? मेरो आग्रह छ, सरकार र आन्दोलनबीच हस्तक्षेपकारी भूमिका खेल्न सभामुखसँग आग्रह छ ।’