०६ साउन २०८३, बुधबार
काठमाडौं –स्थानीय तहका लागि लोक सेवा आयोगले गरेको विज्ञापनका सम्बन्धमा परेका ४ रिटमाथि सर्वोच्चमा आज पनि सुनुवाइ हुँदैछ ।
ती रिट न्यायाधीशद्वय हरिकृष्ण कार्की र डा. आनन्दमोहन भट्टराईको संयुक्त इजलासमा परेको छ ।
यसअघि आइतवार चारवटै रिटमाथि एक साथ सुनुवाइ शुरू भएको थियो । बहस नसकिएपछि हेर्दाहेर्दैमा राखेर अर्को सुनुवाइ आजका लागि तोकिएको थियो ।
अधिवक्ता विकास ठाकुरले लोक सेवाले निकालेको विज्ञापन संविधानको मर्म र समानुपातिक समावेशी सिद्धान्तविपरीत रहेको जिकर गर्दै त्यसलाई रद्द गर्न अन्तरिम आदेशको माग गर्दै रिट दायर गरेका छन् ।
अधिवक्ता राजाराम घिमिरेले प्रतिनिधि सभाको राज्य व्यवस्था तथा सुशासन समितिले विज्ञापन रद्द गर्न लोक सेवा आयोगलाई दिएको निर्देशन गैरकानूनी रहेको जिकिर गर्दै रिट दायर गरेका छन् ।
लोक सेवाकै विज्ञापनसम्बन्धी अन्य दुई रिटमाथि पनि एक साथ सुनुवाइ भइरहेको छ ।
लोक सेवाले स्थानीय तहका लागि ९ हजार १ सय ६१ पदका लागि विज्ञापन आह्वान गरेको छ ।
यसका लागि आवेदन दिने म्याद यही असार १० गते मंगलवार सकिए पनि आउँदो १७ गतेसम्म दोब्बर दस्तुर तिरेर आवेदन दिन सकिने आयोगले जनाएको छ ।
