२१ जेठ २०८३, बिहीबार
काठमाडौं – हङकङमा विरोधकर्ताहरू बेइजिङको विशाल शक्तिका अगाडि ध्वस्त हुने चेतावनी चीनले दिएको छ ।
सरकारविरोधी आन्दोलनमा सहभागी तीनजना युवाले मुकुण्डो लगाएर मंगलवार पत्रकार सम्मेलन गरेपछि बेइजिङको यो भनाइ आएको हो ।
बेइजिङले ती युवाको अभियानप्रति आपत्ति उठाउँदै आगोमा खेल्नेहरू त्यसैमा डढ्ने बताएको छ । यसबाट निकै भारी सैन्यशक्ति प्रयोग गरिने संकेत पाइएको छ ।
सैन्य तैनाथीका विषयमा प्रश्न गरिँदा चीनका हङकङ मामिला कार्यालयका एक प्रवक्ताले जनमुक्ति सेना बलियो शक्ति भएको र यसले देशका सबै भूभागको प्रतिरक्षा गर्ने बताए ।
चीनको हङकङ र मकाउ मामिला कार्यालयका प्रवक्ता याङ गुआङले बेइजिङमा पत्रकारहरूसँग कुराकानी गर्दै विरोधकर्ताहरूले परिस्थितिको गलत मूल्यांकन गर्न नहुने र चीनको संयमलाई कमजोरी ठान्न नहुने चेतावनी दिए ।
चीनविरोधी शक्तिहरूले पर्दापछाडि लुकेर चिनियाँ भूमिमा हिंसा मच्चाउन भड्काइरहेको याङले बताए ।
मंगलवार हङकङका तीन प्रदर्शनकारीले लोकतन्त्र, स्वतन्त्रता र समानताको पक्षमा धारणा राखे अनि बेइजिङपक्षीय नेताहरूको आलोचना गरे ।
उनीहरूले लोकतान्त्रिक आन्दोलनको प्रतीक बनेको पहेंलो हेल्मेट लगाएका थिए भने अनुहारमा मुकुण्डो लगाएर पहिचान लुकाएका थिए ।
एजेन्सी
