०२ साउन २०८३, शनिबार
काठमाडौं — भारतीय सिने इतिहासमा केही फिल्मले प्रदर्शनपछि इतिहासको पृष्ठमा नाम दर्ता गराएका छन् । सफलता वा असफलताको सवालमा उनीहरूले नाम लेखाएका हुन् ।
अहिलेको समयमा चाहिँ दुई यस्ता फिल्म छन् जसको प्रदर्शन भइसकेको छैन तर पहिल्यै उनीहरूको नाम इतिहासमा दर्ता भइसक्यो ।
यी दुवै फिल्म प्राविधिक श्रेष्ठताका साथसाथै भिन्न कथानकका कारण आजकल खुबै चर्चामा छन् ।
दुवैको बजेट पनि ठूलो छ अनि क्यानभास र छायांकन पनि भव्य छ ।
यी दुवै दक्षिण भारतीय फिल्म हुन् ।
एस राजामौलीको बाहुबली २ र शंकरको २.० को यहाँ हामी कुरा गरिरहेका छौं । बक्स अफिसमा ब्लकबस्टर कमाइभन्दा पहिले नै यी दुई फिल्मले आफूलाई ऐतिहासिक फिल्मको सूचीमा चढाइसकेका छन् ।
बाहुबलीले धेरै पैसा कमाएकोमा बाहुबली २ ले पनि कमाउने त देखिएकै छ । अनि २.० मा रजनीकान्त र अक्षय कुमारको तालमेलले यसलाई हेर्नैपर्ने फिल्म बनाइदिएको छ ।
२.० को बजेट ४५० करोड भारु छ भने बाहुबली २ को २५० करोड भारु ।
अहिले नै स्याटेलाइट्स राइटहरू बेचेर यी फिल्मले लगानी उठाइसकेका छन् र बक्स अफिसमा धमाका गरेर अझै धेरै पैसा कमाउने लक्षण यिनीहरूले देखाएका छन् । ट्रेड विश्लेषकहरूले यी फिल्मको कमाइ १४०० करोड भारु हुने अनुमान लगाएका छन् ।
एजेन्सीको सहयोगमा
