२३ जेठ २०८३, शनिबार
काठमाडौं –सातै प्रदेशका प्रदेश प्रमुखलाई पदमुक्त गर्नु सरकारको अनुदार लोकतन्त्रको अभ्यास भएको साझा पार्टीले टिप्पणी गरेको छ । सोमवार पार्टीका प्रवक्ता डा. सुर्यराज आचार्यले एक विज्ञप्ति जारी गर्दै सरकारको यस्तो कदम खेदजनक भएको टिप्पणी गरेका हुन् ।
विज्ञप्तीमा भनिएको छ, पाँच वर्षका लागि संवैधानिकरूपमा नियुक्त भएका प्रदेश प्रमूखहरूलाई हालको प्रमूख प्रतिपक्षि र तत्कालिन सत्तारूढ पार्टी नेपाली कांग्रेसको सरकारले नियुक्त गरेकै कारण एकै पटक पदबाट हटाउनु हेर्दा संविधानको परिधिभित्र देखिने तर अभ्यासमा अनुदार लोकतन्त्रको अर्को ज्वलन्त उदाहरण हो।
साझाले दुई-तिहाई समर्थन प्राप्त शक्तिशालि सरकारले देशलाई विकास र संवृद्धिको मार्गमा डोर्याउन गर्नु पर्ने अनगिन्ति कामहरूप्रति ध्यान नै नदिई ‘कामकुरो एकातिर, कुम्लो बोकी ठिमीतिर’ भन्नेतर्फ अल्झिरहेको समेत टिप्पणी गरेको छ ।
