१० असार २०८३, बुधबार
उत्तर कोरियाका नेता किम जोङ–उनले आइतवार सैन्य विमानको उडान प्रदर्शनमा सहभागी भएर युद्धविमान चालकहरूलाई हतियारले सुसज्जित शत्रुहरूको सामना गर्नका लागि उम्दा अवधारणा र रणनीति ल्याउन निर्देशन दिएका छन् ।
प्योङयाङको आधिकारिक कोरियन सेन्ट्रल न्युज एजेन्सीले युद्धविमानका चालकहरूले अपराजेय शक्ति देखाएको भन्दै सन्तुष्टि व्यक्त गरेका छन् भनी लेख्यो । त्यसक्रममा किमले वाशिङटन वा सउलका विषयमा गरेको टिप्पणीलाई केसीएनएले उल्लेख गरेन ।
‘शत्रुहरूले आफ्नो प्राविधिक सर्वोच्चताको घमण्ड गर्न सक्छन् तर उनीहरूले हाम्रा सैनिकहरूको राजनीतिक तथा विचारधारात्मक अनि युद्धपरक तथा नैतिक सर्वोच्चतालाई टप्न सक्दैनन् भनी उहाँले जोड दिनुभयो,’ केसीएनए लेख्छ ।
वोन्सान काल्मा विमानस्थलमा गरिएको हवाई प्रदर्शनमा तैनाथ गरिएका विमानको विस्तृत विवरण रिपोर्टमा उल्लेख गरिएको छैन । किमको आधिकारिक विमान चाम्माए–१ अन्य सैन्य विमानको सुरक्षाका साथ हवाईमैदानमाथि उडेको उसले लेख्यो ।
एजेन्सी
