काठमाडौं, २५ चैत –स्थानीय तहको निर्वाचनको कुनै पनि गतिविधिमा बालबालिकालाई प्रयोग नगर्न केन्द्रीय बालकल्याण समितिले ध्यानाकर्षण गराएको छ ।

निर्वाचनसँग सम्बन्धित गतिविधिले बालबालिका जोखिम पर्ने भन्दै समितिले यस्तो कार्यमा संलग्न नगराउन आग्रह गरेको हो ।

समितिले निर्वाचनसँग सम्बन्धित प्रचारप्रसार लगायतका कार्यमा बालबालिकालाई प्रयोग नगर्न, विद्यालय क्षेत्रभित्र आमसभा, माइकिङ लगायतका गतिविधिमा संलग्न नगर्न÷नगराउन सबै राजनीतिक दललाई आग्रह गरेको छ ।

त्यस्तै शैक्षिक संस्थाको भित्ता वा पर्खालमा पोस्टर नटाँस्न, भित्ते लेखन नगर्न, विजय जुलुसमा बालबालिकालाई सहभागी नगराउन अपिल गरेको समितिका कार्यकारी निर्देशक तारक धितालले जानकारी दिए ।
अधिकांश राजनैतिक दलले चुनावी गतिविधिमा बालबालिकाको प्रयोग नगर्ने प्रतिबद्धता जनाए पनि केही ठाउँका विद्यालयमा राजनीतिक सभा भएको देखिएकाले यस्तो नगर्न विज्ञप्तीमा उल्लेख छ ।

निर्वाचन आयोगले जारी गरेको निर्वाचन आचारसंहितामा पनि निर्वाचन प्रचार प्रसार,आमसभा तथा जुलुसमा बालबालिकाको प्रयोग गर्न वा गराउन नहुने उल्लेख गरिएको छ ।