१४ असार २०८३, आइतबार
जिल्ला प्रहरी कार्यालय सुर्खेतले भित्रिवस्त्र कट्टुमा लुकाएर लागूऔषध ‘ब्राउनसुगर’ ओसारपसार गर्ने एक जनालाई पक्राउ गरेको छ ।
बर्दियाको मधुवन नगरपालिका–५ शान्तिपुरका दिनेश थापा लागूऔषधसहित पक्राउ परेका जिल्ला प्रहरी कार्यालय सुर्खेतका प्रवक्ता डीएसपी रवि रावलले बताए । उनका अनुसार थापाले ३० ग्राम १३० मिलिग्राम ब्राउनसुगर कट्टुभित्र गोजी बनाएर अड्याएका थिए ।
‘चेकजाँच गर्दा पनि पत्ता नलागोस् भनेर कट्टुभित्र लिङ्गमा अड्याएर ल्याएको रहेछ,’ चेकजाँचमा खटिएका प्रहरी हवल्दार लालबहादुर परियारले भने, ‘छामछुम गर्दा लिंग र ब्राउनसुगर छुट्याउन मुस्किल थियो, कट्टु फुकालेपछि वास्तविकता पत्ता लाग्यो ।’
ब्राउनसुगर बिक्री गरी ल्याएको ८४ हजार ८ सय २० रुपैयाँ समेत प्रहरीले बरामद गरेको छ । उनी नेपालगञ्जबाट भे५प ४७७१ नम्बरको स्कुटरमा सुर्खेत आउँदै थिए ।
सुर्खेतको वीरेन्द्रनगर–११ सुब्बाकुना चेकपोस्टमा खटिएको प्रहरी टोलीले उनलाई शुक्रवार राति पक्राउ गरेको हो । थापाको विषयमा थप अनुसन्धान भइरहेको प्रहरीले जनाएको छ ।
