‘छक्का पञ्जा’मा निर्देशकको भूमिकामा सफल निरौला सिनेप्रेमी दर्शकको मनमा समेत छाएकी छिन् । धन कमाउन विदेश जानुपर्ने बाध्यात्मक परिस्थितिलाई कथावस्तु बनाइएको चलचित्र ‘छक्का पञ्जा’ले बक्स अफिसमा सबैभन्दा धेरै कमाएर रेकर्ड नै राख्यो ।

चलचित्रको सफलतापछि अन्य चलचित्रबाट समेत निर्देशनको प्रस्ताव आएपनि समूहमा काम गर्नका लागि अरू चलचित्र अस्वीकार गरेको बताउने दीपाश्री निरौलासँग लोकान्तरका लागि अर्घेलो थापाले सोमवार कुराकानी गरेका थिए । प्रस्तुत छ, कुराकानीको संक्षेपः

पहिलोपटक निर्देशनको अनुभव कस्तो रह्यो ?

वास्तवमा मेरो यो पहिलो निर्देशन होइन । ठूलो पर्दाको लागि पहिलो भएपनि मैले सानो पर्दामा २० वर्षदेखि सिकिरहेको काम हो । धेरै टेलिसिरियलमा मैले सहायक निर्देशन भएर काम गरेकी थिएँ । ‘तितो सत्य’मा पनि मैले सहायक निर्देशकका रूपमा काम गरेकी छु । ठूलो चलचित्रको अनुभव भने मैले यस चलचित्रबाट लिएकी हुँ ।

चलचित्र ‘छक्का पञ्जा’ले एक सय दिन मनाउला भन्ने लागेको थियो ?

कहाँबाट सोच्नु ? (लामो हाँसो हाँस्दै) चलचित्र कस्तो चल्छ भन्ने त पहिल्यै थाहा हुँदैन नि । पहिलेका चलचित्र ‘वडा नं. ६’ र ‘६ एकान ६’ को सफलताले हास्य विधाको चलचित्र चल्छ भन्ने चाहिँ लागेको थियो । व्यावसायिक रूपमा हास्यप्रधान चलचित्र बनाउन सकिन्छ भनेर ‘तितो सत्य’ निर्माण गर्दा नै अनुभव चाहिँ गरिसकेका थियौं ।

त्यसो भए नेपाली चलचित्र जगतमा आँसु बिक्न छाडेको हो ?

त्यसो होइन । ‘नाइँ नभन्नु ल...’ जस्ता चलचित्र पनि नेपाली दर्शकले रुचाएका छन् । ‘पशुपतिप्रसाद’ र ‘लूट’जस्ता फरक धारका चलचित्र पनि सफल भएका छन् । अहिले भने हाँसो बिक्रीमा छ भन्ने कुरा हामीले ‘छक्का पञ्जा’ले १०० दिन मनाएको आधारमा पनि आँकलन गर्न सक्छौं ।

अहिले यो चलचित्रको व्यापार कस्तो छ ?

अहिले पनि यसको ८० प्रतिशत ‘अकुपेन्सी’ छ ।

‘छक्का पञ्जा’ले १६ करोडको व्यापार गर्‍यो भन्नुभयो, अब के गर्ने योजना छ ?

हामीेले नयाँ फिल्मका लागि योजना बनाइरहेका छौं । एक दुईवटा स्क्रिप्टबाट पनि आएका छन् । चित्त बुझ्यो भने काम थाल्छौं ।

अन्य फिल्मकर्मीले प्रस्ताव गरेको फिल्मलाई तपार्इंले ठाडै अस्वीकार गर्नुभयो रे नि ?

अन्य चलचित्रकर्मीबाट पनि प्रस्ताव आएको हो । टिमले नयाँ चलचित्र निर्माण गर्ने योजना बनाएकोले नै अन्य फिल्मलाई स्वीकार गर्न नसकिएको हो । दीपकजी लगायत अन्य कलाकारबीच ट्युनिङ मिलिरहेकाले पनि मलाई काम गर्न सहज भएको छ । भविष्यमा भने अन्य फिल्ममा पनि काम गर्ने योजना छ ।

अरू चलचित्र निर्देशन गर्नुभयो भने यस्तै हिट हुन्छन् भन्ने लाग्छ ?

चलचित्र राम्रो बन्नका लागि विषयवस्तु चाहिन्छ । कमेडी चलचित्र राम्रो बनाउन सकियो भने उत्कृष्ट बन्छ । बनाउन सकिएन भने स्वादहीन बन्छ । अर्को महत्वपूर्ण कु्रा के हो भने ‘टिम वर्क’ विना चलचित्रलाई निर्देशन गरेर मात्र राम्रो बनाउन सकिन्न ।

अभिनय क्षेत्रमा काम गर्न थाल्नुभएको २० औं वर्ष भइसक्यो । नेपाली समाजमा २० वर्षको उमेर पुगेपछि कतिपय युवतीले बिहे नै गर्छन् त ! बिहे नगर्ने ?

म योजना बनाएर हिँड्दिनँ । योजना असफल भयो भने दुःख पाइन्छ भन्ने लाग्छ । मन दुख्दो रैछ । समयसापेक्ष जे हुन्छ, त्यो कुरालाई स्वीकार्दै अगाडि बढ्न रुचाउँछु । भावुक चरित्रबाट अभिनयमा छिरेपछि आफूलाई हास्य कलाकारका रूपमा चिनाएकी छु । योजना त मेरो हास्य कलाकार बन्ने पनि त थिएन नि ।

अब त बिहेको योजना पनि होला नि ?

बिहे भन्नु समयको बहाव हो । बिहे त आखिर गर्नु नै पर्छ तर लेखेको के हुन्छ, त्यही अनुसार हुन्छ । बिहेबारे मैले आजभन्दा १० वर्ष अगाडि नै सोचेकी थिएँ । सोचेको सबै पूरा नहुने रहेछ । राजेश (हमाल) दाइलाई हेरेर चित्त बुझाउँछु । उहाँको पनि ढिला बिहे भयो, मेरो पनि ढिला नै होला ।

एकातिर व्यावसायिक जिन्दगीमा सफल भइरहनुभएको छ, व्यावसायिक जिन्दगीले तपार्इंको व्यक्तिगत जिन्दगीलाई ओझेलमा पारेजस्तो भएन र ?

म दुःखी भएको भए पो ओझेलमा पारेको भन्न मिल्थ्यो । म खुशी छु नि त । विवाह भन्ने कुरा लेखेर नहुने रैछ । म विवाहको विरोधी त होइन तर बिहे नै भइदिएन त म के गरौं ?

किन बिहे भएन त ?

मैले आफ्नो करियरलाई मात्रै महत्व दिएँ । अरू कलाकारको स्थिति देखेर बिहेपछि आफ्नो करियर ओझेलमा पर्ला कि भनेर शुरुमा बिहे गर्नुपर्छ भन्न लागेन । अहिले भने महसूस भइरहेको छ । अब बिहे पनि होला नि ।

बिहेका लागि माग्न त आउँछन् नि है ?
अहिले त माग्न आउनै छोडे । (हाँस्दै) यो काम, काम भनेर पछि लाग्छे, के माग्नु यसलाई भनेर माग्न छोडे कि भन्ने लाग्न थाल्यो ।

अरू विधाका तुलनामा निर्देशन गर्न गाह्रो रहेछ ?

निर्देशन आफैमा गाह्रो काम हो । निर्माताको विश्वास र जिम्मेवारी पनि बढी हुन्छ तर मलाई ‘छक्का पञ्जा’ निर्देशन गर्न त्यति गाह्रो भएन किनकि मैले टिमबाट राम्रो साथ पाएँ । हास्य विधा भएकोले पनि यो चलचित्र निर्देशन गर्न मलाई सजिलो भयो ।

आम दर्शकले दीपक र दीपाको साँच्चिकै बिहे भएको छ भन्ने पनि सोच्छन् नि ?

दर्शकले सोच्नु स्वाभाविक हो । लामो समयदेखि नै दीपकजी र म जोडी भएर हिँडिरहेका छौं । हाम्रो समाजमा दुई दिन साथै हिँडे त मान्छेले कुरा काट्न थाल्छन् भने हामी त लामो समयदेखि सँगै छौं । हामीबीच माया नभएको होइन, धेरै नै माया छ किनकि दुवैले कामलाई महत्व दिन्छौं । हामीमा माया त छ, तर बीचमा एउटा तगारो के छ भने दीपकजीको बिहे भइसकेको छ । (लामो हाँसो)

बहुविवाह गर्न मिल्दैन है ?
बिहे गर्‍यो भने कानूनले मलाई छोड्ला र ? वास्तवमा बिहे मात्र साइनो हुँदैन । बिहेभन्दा माथिको पनि साइनो हुन्छ । असल साथी भएर पनि त बाँच्न सकिन्छ नि ।

यत्रो लामो जीवनकालमा प्रेम त गर्नुभयो होला नि ?

प्रेम नै नगरेको त कहाँ हो र ? सोह्र वर्षकै उमेरमा प्रेम भयो । त्यो बेलाको प्रेम यसै छुट्यो । अझैपनि उहाँसँग कहिलेकाहीँ कुरा हुन्छ । उहाँले आफ्नो जिन्दगी बाँच्नुभएको छ । जे होस्, रमाइलो लाग्छ ।

भविष्यका योजना ?

नेपाली नारीले निर्देशन गरेको चलचित्र ‘छक्का पञ्जा’ले १०० दिन मनाएको यो पहिलो हो । कतै कार्यक्रममा जाँदा पनि ‘ओहो ! तिमीले राम्रो गर्‍यौ’ भन्दा खुशी लाग्छ । नेपालमा चिनिने चलचित्र बनायौं भने अब विश्वमा चिनिने फिल्म बनाउने योजना छ ।