काठमाडौं, पुस ५– अमेरिकी राजदुत अलाईना बी टेप्लिजले प्रमुख प्रतिपक्ष दलका नेता एमाले अध्यक्ष केपी ओलीसँग भेट गरेकी छन् ।
मंगलबार बिहान भएको भेटमा उनले संविधान संशोधन प्रस्तावको विरोध गर्नुपर्ने कारणबारे चासो व्यक्त गर्नुका साथै संसद अवरुद्ध भइरहेको तर्फ अध्यक्ष ओलीको ध्यानाकर्षण समेत गराइन् ।
भेटमा ओलीले संविधान संशोधन प्रस्ताव जनता र राष्ट्रको हित विपरित आएकाले विरोध गर्नुपरेको बताएका थिए ।
भेटपछि एमाले संसदीय दलका उपनेता सुवासचन्द्र नेम्वाङका अनुसार अमेरिकी राजदूतले संविधान संशोधन प्रस्तावको विरोध गर्नुको कारणबारे चासो व्यक्त गरेकी थिइन् ।
एमाले अध्यक्ष ओलीले भने नेपालको आन्तरिक विषय भएकाले यसमा अनावश्यक चासो नलिन आग्रह गरे । ओलीले राजदूतलाई नेपालीहरुले नै मिलेर समाधान गर्न समक्ष रहेको जवाफ दिएको नेम्वाङले जानकारी दिए ।
