२४ जेठ २०८३, आइतबार
भारतको नयाँ राजनीतिक नक्साले देशको सार्वभौम क्षेत्रलाई सही रूपमा इंगित गरेको भारतीय विदेश मन्त्रालयका प्रवक्ता रवीश कुमारले बिहीवार बताएका छन् ।
नियमित पत्रकार सम्मेलनका क्रममा एक पत्रकारले कुमारलाई भारतका प्रधानमन्त्री नरेन्द्र मोदी र नेपालका प्रधानमन्त्री केपी शर्मा ओलीबीचको संवादमा कालापानीको कुरा उठेको विषयमा प्रश्न गर्दा उनको यो भनाइ आएको हो ।
उनले प्रधानमन्त्रीद्वयको टेलिफोन कुराकानीमा नयाँ वर्षको शुभकामना आदानप्रदान भएको र नेपाल तथा भारतबीचको सदियौं पुरानो सभ्यतागत सम्बन्धकै अनकूल यस्तो संवाद भएको अनि भारतको छिमेकी पहिलो नीतिअन्तर्गत कुराकानी भएको बताए ।
त्यसपछि भारतको राजनीतिक नक्साका बारेमा कुरा गर्दै उनले नयाँ नक्साले भारतको सार्वभौम भूभागको सही चित्रण गरेको कुरा दोहोर्याए ।
उनले भने, ‘नयाँ नक्साले नेपालसँगको हाम्रो सिमानालाई कुनै हालतमा पनि परिवर्तन गरेको छैन । विद्यमान संयन्त्र अन्तर्गत नेपालसँग सीमा निर्धारण अभ्यास अहिले पनि जारी छ । हामी दुई देशबीचका सबै सीमा समस्याहरू आपसी सम्बन्धको मर्मअनुरूप संवादमार्फत हल गर्ने प्रतिबद्धता व्यक्त गर्छौं । दुई प्रधानमन्त्रीबीच के विषयमा वार्ता भएको हो भन्ने कुराको प्रेस रिपोर्टका आधारमा प्रतिक्रिया दिनु अत्यन्तै कठिन हुन्छ । मैले नेपाली पक्षबाट यस विषयमा कुनै पनि आधिकारिक भनाइ पाएको छैन ।’
यसअघि भारतका प्रधानमन्त्री नरेन्द्र मोदीले नयाँ वर्षको दिनमा प्रधानमन्त्री केपी शर्मा ओलीसँग टेलिफोन वार्ता गरेको र त्यसक्रममा कालापानीको विषय पनि उठेको प्रधानमन्त्रीका प्रेस सल्लाहकार सूर्य थापाले बताएका थिए ।
"The new map, has in no manner, revised our boundary with Nepal": Raveesh Kumar, Spokesperson, Ministry of External Affairs pic.twitter.com/zuJ0AsazCS
— NDTV (@ndtv) January 2, 2020
