१९ असार २०८३, शुक्रबार
थाइल्यान्डको सी राचा चिडियाखानाले बाघको खोरमा दुईवटा सुँगुरका पाठा राखेपछि विवाद निम्तिएको छ । पर्यटकहरूको मनोरञ्जनका लागि भन्दै पाठाहरू खोरमा राखिएको थियो ।
बाघले सुँगुरका पाठा लखेटेको दृश्य देखाएर चिडियाखानाका पर्यटकको संख्या बढाउन खोजिएको थियो ।
घटनाको भिडियो फूटेजमा दुई पाठा खोरको देब्रेपट्टि राखिएको र २१ वर्षीया बघिनी साइमाइले उनीहरूलाई हेरेको देखिन्छ ।
साइमाइले एक पाठामाथि आक्रमण गरेको देखिन्छ ।
बाघले बिचरो पाठोलाई पञ्जाले भुइँमा पछारेको र उसको ढाडमा आफ्नो दाह्रा गाडेको देखिन्छ ।
बाघलाई चिडियखानाको कर्मचारीले ध्यान भंग गरेपछि पाठो पञ्जाबाट फुत्किन सफल हुन्छ ।
भिडियो सार्वजनिक भएपछि आक्रोश फैलिएको छ । पशु कल्याण अधिकारीहरूले घटनाको भोलिपल्ट चिडियाखाना भ्रमण गरेका थिए ।
यसरी जनावरहरूलाई अर्को जनावरको खोरमा लगेमा चिडियखानाको अनुमतिपत्र रद्द गरिने उनीहरूले चेतावनी दिए ।
अचम्मको कुरा त बाघको खोरमा साइमाइ मित्रवत जनावर भएको र सुँगुर्नीको दूध खाएर हुर्किएको लेखिएको छ ।
