२८ असार २०८३, आइतबार
चीनको वुहानमा शुरू भएको नोवल कोरोनाभाइरसका कारण देशमा ३६१ जनाको ज्यान गएको छ । सन् २००३ मा आएको सार्स महामारीले भन्दा कोरोनाभाइरसले बढी ज्यान लिएको छ ।
चीनका स्वास्थ्य अधिकारीहरूले सोमवार ३६१ जनाको मृत्युको पुष्टि गरे । आइतवार साँझसम्म चीनमा कोरोनाभाइरसका १७ हजार २०५ केस देखिएका छन् ।
सत्र वर्षअघि देखिएको सार्सका कारण चीनमा ३४९ जनाको मृत्यु भएको थियो भने ५ हजार ३२७ जना संक्रमित भएका थिए ।
चीनबाहिर कोरोनाभाइरसका कारण एकजनाको मृत्यु भएको छ । वुहानबाट फिलिपिन्स गएका ४४ वर्षीय एक चिनियाँ नागरिकको शनिवार मृत्यु भएको छ ।
अहिलेसम्म चीनबाहिर १७५ वटा संक्रमणका केस देखिएका छन् । संसारभरिका २५ देश र नियन्त्रित भूभागमा यो संक्रमण देखिएको हो । चीनसँग सीधा सम्पर्कमा रहेका अधिकांश देशमा संक्रमण देखिएको हो ।
धेरै देशहरूले चीनबाट आउने यात्रुका लागि आफ्नो सीमा बन्द गरेका छन् र प्रमुख एयरलाइन्सहरूले चीनबाट आउने र चीन जाने उडान रद्द गरेका छन् ।
सीएनएनबाट
