काठमाडौं- मुक्तिनाथ विकास बैंक र महालक्ष्मी लाइफ इन्स्योरेन्सबीच बिहीवार बीमा सेवा दिने सम्झौता भएको छ ।

सम्झौताअनुसार मुक्तिनाथ विकास बैंक लि.ले देशभर रहेका आफ्ना १२० शाखाहरूबाट महालक्ष्मी लाइफ इन्स्योरेन्स लि.को जीवन बीमा योजनाहरू बिक्री गर्नेछ ।

महालक्ष्मी लाइफ इन्स्योरेन्सले साबधिक बीमा योजना, डबल सावधिक बीमा योजना र लगानी फिर्ता बीमा योजना सार्वजनिक गर्दै २०७५ माघ २७ गतेबाट कारोबार प्रारम्भ गरेको छ ।

महालक्ष्मी लाइफ इन्स्योरेन्सले काठमाडौं, पोखरा, वीरगञ्ज, इटहरी, लहान, नारायणघाट, बुटवल, कोहलपुर र सुर्खेतबाट कारोबार प्रारम्भ गरिसकेको छ र यही चैत महिनाभित्र काठमाडौं उपत्यकाका १० स्थानबाट कारोबार सञ्चालनको तयारी गरिरहेको छ ।

सम्झौतामा मुक्तिनाथ विकास बैंक लि.को तर्फबाट का.वा. प्रमुख कार्यकारी अधिकृत तिलबहादुर गुरूङ र महालक्ष्मी लाइफ इन्स्योरेन्स लि. को तर्फबाट नायब प्रमुख कार्यकारी अधिकृत कमल पन्थीले हस्ताक्षर गरे ।