काठमाडौं – विराट कोहलीले लगातार राम्रो प्रदर्शन गरेर आफूलाई महान् खेलाडीहरूको सूचीमा पारिसकेका छन् । तर इंग्ल्यान्डमा हुने विश्वकपमा भारतीय कप्तानले आफ्नो छाप छोड्ने मौका पार्नेछन् । 

कोहलीले नेतृत्व गर्ने टीममा केही समस्या छन् तर म्याच आफ्नो पक्षमा पार्ने खेलाडीको संख्या ठूलो छ । ठूला टुर्नामेन्टमा यस्ता खेलाडी आवश्यक हुन्छन् । 

सात हप्तासम्म चल्ने विश्वकपमा कोहली महत्त्वपूर्ण खेलाडी हुन् । यसै प्रतियोगितामा उनले ११ हजार रन पूरा गर्ने आशा गरेका छन् । उनले ४१ शतक बनाइसकेका छन् र त्यसमा थव वृद्धि गर्न चाहन्छन् । 

इंग्ल्यान्डका पिचहरू सपाट छन् । रोहित शर्माले आफ्नो शानदार ब्याटिङका कारण अझै शतक बनाउन सक्छन् । उनले चौथो दोहोरो शतक पनि बनाउने सम्भावना छ । तर रोहितले आफ्नो फर्म कायम राख्नुपर्ने हुन्छ ।

टीममा शिखर धवन पनि छन् । उनले आईसीसीको आयोजनामा रहेका प्रतियोगितामा खराब प्रदर्शन गर्ने गरेका छैनन् र यो कीर्तिमानलाई उनी कायम राख्न चाहन्छन् । 

तर टीम इन्डियामा चौथो क्रमको ब्याट्स्म्यानको समस्या छ । अम्बाती रायुडु यसमा असफल भएपछि यहाँ खेल्ने अर्को खेलाडी पाइएको छैन । ऋषभ पन्तलाई टीममा समावेश गरिएको छैन । उनको स्थानमा दिनेश कार्तिकको अनुभवलाई पत्याइएको छ । 

विजय शंकर वा लोकेश राहुललाई चौथो क्रममा खेलाउन सकिन्छ । तर उक्त क्रमको खेलाडीले निकै जिम्मेवार भएर खेल्नुपर्ने हुन्छ । 

महेन्द्र सिंह धोनीको यो सम्भवतः अन्तिम विश्वकप हो । उनका प्रशंसकका लागि यो भावनात्मक क्षण हुनेछ । तर ३५ देखि ५० ओभरका बीचमा ७० को स्ट्राइक रेटमा तीव्र गतिमा रन बटुल्ने खुबीका कारण प्रतिस्पर्धी टीमका लागि धोनी टाउकोदुखाइ साबित हुन सक्छन् । 

छैठौं नम्बरमा केदार जाधव हुनेछन् र उनी जुन ५ सम्ममा फिट भइसक्ने अनुमान छ । त्यस दिन साउथह्याम्पटनमा दक्षिण अफ्रिकाविरुद्ध खेलेर भारतले विश्वकपको आरम्भ गर्नेछ । तर आईपीएलमा जाधवको प्रदर्शन राम्रो नहुँदा चिन्ताको विषय पनि बनेको छ ।

सातौं नम्बरमा हार्दिक पाण्ड्या छन् । उनी बहुमुखी प्रतिभा भएकाले भारतले उनको सदुपयोग गर्ने अपेक्षा छ । डेथ ओभरमा छक्का हान्ने उनको खुबीले खेलको परिदृश्य परिवर्तन गर्न सक्छ । 

भारतीय टीम व्यवस्थापन र सेलेक्टरहरूले विगत दुई वर्षमा स्पिनर कुलदीप यादव र युजवेन्द्र चहलमा खुबै जोड दिएका छन् । उनीहरूले राम्रो सफलता पनि पाएका छन् । कुलदीपको फर्म आईपीएलमा चाहिँ राम्रो रहेन । 

जसप्रीत बुमराह टीममा परेका छन् र उनी आगामी वर्षहरूका स्टार हुन् । मोहम्मद शमीको स्विङ र बुमराहको डेथ ओभरमा योर्करले विपक्षी टीमलाई हायलकायल बनाउन सक्छ । 

नौ लीग म्याचमध्ये ६ मा जीत हासिल गरेर सेमिफाइनलमा क्वालिफाई गर्ने लक्ष्य भारतको हुनेछ ।

एजेन्सी