१० असार २०८३, बुधबार
भारतमा नागरिकता संशोधन विधेयकको विरोध चलिरहँदा मानिसहरूले अर्काको धर्म कुन हो भनी सोध्ने अनि धार्मिक आधारमा कुटपिट गर्ने घटना भएको खबर आएको छ ।
द टाइम्स अफ इन्डियाका फोटोजर्नलिस्टलाई सोमवार सबा १२ बजेतिर मौजपुर मेट्रो स्टेसनमा हिन्दू सेनाका एक सदस्यले निधारमा तिलक लगाइदिए । उनले फोटोजर्नलिस्टलाई भने, ‘तपाईं पनि हिन्दू नै हुनुहुन्छ । यो तिलक लगाउँदा तपाईंलाई के हानि ?
लगभग १५ मिनेटपछि दुई समूह एकअर्कालाई ढुंगा हान्न थाले । मोदी मोदी भन्दै नारा लगाइयो र आकाशमा धूवाँ उडेको देखियो । फोटोजर्नलिस्ट आगो लागेको भवनतिर जाँदा केही मानिसले उनलाई शिव मन्दिर नजिक रोके । उनले फोटोजर्नलिस्टलाई सोधे, ‘तपाईं पनि त हिन्दू हो । किन त्यता गइरहेको ? अहिले हिन्दू जागेको छ ।’
त्यो सुनेर फोटोजर्नलिस्ट रोकिए । केही समयपछि उनी ब्यारिकेडतिर गए । फोटो खिच्न थाल्दा केही मानिस हातमा लट्ठी र रड लिएर आए । उनीहरूले क्यामरा खोस्ने कोशिश गरे तर द टाइम्स अफ इन्डियाका रिपोर्टर साक्षी चन्द आइपुगे र चिच्याउन थाले । अनि उनीहरूले छोडिदिए ।
केही समयपछि उनलाई मानिसहरूले पछ्याएको जस्तो लाग्यो । एक युवकले उनलाई भने, ‘तिमी किन चुमचुम गर्दैछौ ? हिन्दू हौ कि मुसलमान ?’ धर्म पत्ता लगाउन प्यान्ट खोलेर लिंग हेर्ने समेत उनले धम्की दिए । फोटोजर्नलिस्टले हात जोडेर आफू फोटोग्राफर मात्र भएको बताएपछि उनीहरूले छोडिदिए ।
जाफराबादमा नागरिकता संशोधन कानूनको विरोध गरिरहेका एक व्यक्तिले प्रहरीलाई बन्दूक ताके । उनले गोली पनि चलाए तर कसैलाई पनि लागेन । जाफराबादमा आइतवारबाट शाहीन बाग जस्तो विरोध प्रदर्शन शुरू भएपछि त्यसले हिंस्रक रूप लिइसकेको छ ।
त्यस त्रासद स्थितिमा इलाकाबाट जान खोज्दा एक अटोरिक्शा देखियो । ड्राइभरले अफिससम्म लग्छु भन्यो । फोटोजर्नलिस्टलाई अटोरिक्शा चालकको नामले अप्ठ्यारो पार्न सक्छ भन्ने लाग्यो । अनि केही समयपछि चारजनालाई गाडी घेरिहाले । उनीहरूले चालक र फोटोजर्नलिस्ट दुवैलाई तानेर बाहिर निकाल्न खोजे । फोटोजर्नलिस्टले आफू पत्रकार भएको र चालक निर्दोष रहेको बताएपछि उनीहरूलाई छोडियो ।
फोटोजर्नलिस्ट अफिस पुग्दा अटो ड्राइभर एकदमै डराएका थिए । उनले अटोरिक्शा चालकलाई भने, ‘जीवनमा मलाई कसैले पनि यति नराम्रोसँग धर्मका बारेमा सोधेको थिएन ।’
