३० असार २०८३, मंगलबार
अमेरिकामा डेमोक्रेटिक पार्टीका तर्फबाट राष्ट्रपति उम्मेदवार छान्नका लागि मंगलवार भएको चुनावमा धेरैजसो राज्यमा जो बाइडन विजयी भएका छन् ।
सुपर ट्युस्डे चुनावमा १४ राज्यले मतदान गर्छन् । ती १४ मध्ये नौ राज्यमा बाइडन विजयी भएका छन् भने चारवटा बर्नी स्यान्डर्सले जितेका छन् । एउटामा चाहिँ माइकल ब्लूमबर्ग विजयी भएका छन् ।
बाइडनले अनपेक्षित रूपमा टेक्सस राज्य जितेका छन् ।
सुपर ट्युस्डेपछि डेमोक्रेटिक पार्टीमा अब वस्तुगत रूपमा दुई उम्मेदवार बाइडन र स्यान्डर्स मात्र प्रतिस्पर्धामा छन् । अनि बाइडन स्यान्डर्सभन्दा अगाडि बढेका छन् ।
बाइडनले एकपछि अर्को राज्यमा ठूलो मतपरिणामका साथ विजय प्राप्त गरेपछि स्यान्डर्सले चाहिँ क्यालिफोर्निया जितेका छन् । क्यालिफोर्नियाको विजय निकै ठूलो उपलब्धि हो ।
तर बाइडनले पछिल्लोपटक हासिल गरेको विजयले मध्यमार्गीहरूको मृतप्रायः अभियानलाई जीवन्त तुल्याएको छ । उनलाई अन्य प्रतिस्पर्धीहरू पिट बुट्टिजज र एमी क्लोबुचारले पनि समर्थन गर्ने भएका छन् ।
माइक ब्लूमबर्गका लागि भने सुपर ट्युस्डेपछि निर्वाचन अभियान लगभग टुंगिएको छ । उनले विगत तीन महिनामा एक अर्ब डलर खर्च गरेका थिए तर जम्मा एउटा राज्य अमेरिकन सामोआ मात्र जित्न सके ।
उनका सहयोगीहरूले उनी निर्वाचन अभियानबाट पछि हट्ने कि नहट्ने विषयमा सरसल्लाह गरिरहेको बताएका छन् ।
बाइडनले भर्जिनिया, नर्थ क्यारोलाइना, आलाबामा, ओक्लाहोमा, टेनेसी, मिनेसोटा, आर्कान्सस, मासाचुसेट्सर टेक्सस जितेका छन् । स्यान्डर्सले क्यालिफोर्निया, कोलोराडो, युटाह र भर्मोन्टमा विजय हासिल गरेका छन् ।
