भारतको उत्तर प्रदेशस्थित बहराइचमा नेपालसँगको सीमामा एसएसबीले बुधवार राति एक निजी बसबाट ३१ किलो ३७० ग्राम चरेश बरामद गरेको छ । 

त्यसको मूल्य लगभग १६ करोड पर्छ । 

बस नेपालबाट यात्रीहरू लिएर हरियाणा गइरहेको दैनिक भास्कर पत्रिकाले लेखेको छ । एसएसबीले बसका चालक र एक अन्य आरोपितलाई पक्राउ गरेर प्रहरीलाई सुम्पेको छ । प्रहरीले दुवैलाई जेल पठाएको छ । 

पक्राउ परेकामध्ये चालकको नाम तिलक सुनार हो । उनी दाङको तुलसीपुर निवासी भएको बताइएको छ । 

नार्कोटिक्स कन्ट्रोल रूम लखनउका अधिकारीहरूले बहराइचमा रहेको रुपैडियास्थित एसएसबी ४२औं वाहिनीका अधिकारीहरूलाई नेपालबाट भारतमा चरेस आइरहेको सूचना प्राप्त भयो । अनि कार्यवाहक कमान्डेन्ट शैलेश कुमारले बुधवार राति ११ बजेतिर सघन जाँच गराउन थाले । मध्यराततिर एक निजी बस नेपालबाट भारतीइ सीमा प्रवेश गरेको देखियो । 

एएसबीका अधिकारी र जवानहरूले बसको तलाशी लिँदा छत र डिक्कीमा राखिएका बोरामा चरेस भेटे । चरेसलाई हरियाणा लगिँदैथियो । 

पक्राउ परेका बसचालकसँग नेपाली नागरिकताका साथै हरियाणाको परिचयपत्र पनि छ । उनी हरियाणाको पंचकुलाको घर नम्बर ९२ मा बस्छन् ।