३१ असार २०८३, बुधबार
अमेरिका सेनामा कार्यरत मात्जे बेनास्सी नामक महिलालाई षड्यन्त्र सिद्धान्तकारहरूले कोरोनाभाइरस महाव्याधि फैलाएको आरोप लगाउँदै तारो बनाएपछि मुश्किल परेको छ । उनले नै रोग चीन पुर्याएको भनी आरोप लगाइएको छ ।
यस्ता झूटा दाबीहरू यूट्युबमा लगातार फैलिरहेका छन् र ती भिडियोको भ्युहरू बढिरहेका छन् । त्यसलाई चिनियाँ कम्युनिस्ट पार्टीको सञ्चारमाध्यमले पनि अंगीकार गरेका छन् ।
कोरोनाभाइरस पोजिटिभ पनि नपाइएकी अनि लक्षण समेत नदेखिएकी बेनास्सी र उनका पतिको बारेमा चिनियाँ सामाजिक सञ्जालमा बाक्लो चर्चा गरिन थालेको छ ।
यस्ता दाबीहरू सार्वजनिक हुन थालेपछि बेनास्सी जोडीको जीवन खतरामा परेको छ । उनीहरूको ठेगाना अन्लाइनमा पोस्ट गरिएको छ । सामाजिक सञ्जालमा उनीहरूको इन्बक्समा षड्यन्त्र सिद्धान्तमा विश्वास गर्नेहरूको सन्देश आइरहेका छन् । अहिले उनीहरूले आफ्ना अकाउन्ट बन्द गरिसकेका छन् ।
‘दिनदिनै हामी दुःस्वप्न देख्न बाध्य भएका छौं,’ मात्जेले सीएनएनलाई बताइन् ।
सामाजिक सञ्जालमा फैलिने झूटा दाबीले मानिसको जीवनमा कस्तो असर पार्छ भन्ने कुरा यो घटनाले स्पष्ट बनाएको छ ।
मात्जे र उनका पति म्याट सरकारी जागिरमै छन् । मात्जे भर्जिनियास्थित अमेरिकी सेनाको फोर्ट बेल्भोआमा सुरक्षा अधिकृत हुन् । म्याट अमेरिकी वायुसेनाका सेवानिवृत्त अधिकारी हुन् ।
अमेरिकी सैनिकहरूले कोरोनाभाइरस वुहानमा भित्र्याएको भनी चीनका एक शीर्ष कूटनीतिकर्मीले दाबी गरेपछि मात्जेमाथिको आक्रमण शुरू भएको हो । उनी सन् २०१९ को अक्टोबर महिनामा मिलिटरी वर्ल्ड गेम्समा भाग लिन वुहान शहर पुगेकी थिइन् । त्यही शहरमा गत डिसेम्बर महिनाबाट कोरोना संक्रमण फैलिन शुरू भएको थियो ।
मात्जेले उक्त प्रतियोगितामा साइक्लिङमा भाग लिएकी थिइन् । अन्तिम मोडमा पुग्दा उनी दुर्घटनामा परिन् अनि उनको करङ भाँच्चियो । तैपनि उनले दौड पूरा गरिन् ।
त्यो घाउ त ठीक भयो तर उनको जीवनमा त्यसभन्दा खराब कुरा आउन बाँकी नै रहेछ । अमेरिकी सेनाका सयौं खेलाडीले उक्त प्रतियोगितामा भाग लिएको भए पनि उक्त समूहबाट मात्जेलाई छानेर षड्यन्त्र सिद्धान्तको केन्द्रमा राखियो ।
अब जे हुनुछ त्यो होला तर आफूलाई क्षति भइसकेको मात्जे बेनास्सी बताउँछिन् । ‘अब मेरा लागि पहिलेको समय हराइसक्यो । मेरो नाम गूगल गर्नुभयो भने पेसेन्ट जिरो (कोरोनाभाइरसको पहिलो रोगी) भनेर आइहाल्छ ।
सीएनएनबाट
