प्रत्येक दिन मिडिया ब्रिफिङमार्फत् कोरोना संक्रमणका बारेमा अपडेट दिने स्वास्थ्य मन्त्रालयका प्रवक्ता डाक्टर विकास देवकोटा गुणस्तर तथा नियमन महाशाखामा सरुवा भएका छन् ।

आइतवार ब्रिफिङपछि उनले आफ्नो ठाउँमा डाक्टर जागेश्वर गौतम आउने बताए ।

'हामीले चैत ११ गतेदेखि मन्त्रालयबाट लाइभ शुरू गरेका थियौं,' उनले भने, 'आजसम्म ७६ दिन लाइभ गरियो । यसले मलाई धेरै कुरा सिकायो । म सरुवा भएर गएपछि भोलिबाट डाक्टर जागेश्वर गौतमले लाइभ गर्नुहुनेछ ।'

उनले मिडियाकर्मी र सम्बन्धित सबैलाई धन्यवाद भनेर मिडिया ब्रिफिङबाट विदा लिएका छन् ।