२३ असार २०८३, मंगलबार
कैलालीको एक क्वारेन्टीनमा बलात्कारको घटनाका दोषीलाई कडा कारबाही गर्न नेपाली कांग्रेसले सरकारसँग माग गरेको छ ।
सोमवार एक विज्ञप्ति जारी गर्दै कांग्रेसले क्वारेन्टीनको बेथितिमा सरकारले आफ्नो अनुहार हेर्नुपर्ने बताउँदै बलात्कारको घटनाको घोर भत्र्सना गरेको छ ।
घटनामा संलग्न हुनेलाई कडा भन्दा कडा कारबाही गर्न माग गर्दै कांग्रेसले कारेन्टीनमा सरकारको अयोग्यता झल्किएको टिप्पणी गरेको छ ।
मापदण्ड विपरीतका अव्यवस्थित क्वारेन्टाइनहरु कोरोना संक्रमण विस्तारको केन्द्र बन्दै गइरहेको भन्दै कांग्रेसले अब्यवस्थाका कारण देशका विभिन्न क्वारेन्टीनबाट नागरिक भाग्नुपरेको बताएको छ ।
उसले विज्ञप्तिमा भनेको छ,‘क्वारेन्टीन सुरक्षाका लागि कि सजायका लागि भन्ने प्रश्न उब्जिएको छ र अन्ततः बलात्कार सम्मको घटनाले कम्युनिस्ट सरकारको शासकीय क्षमताको अनुहारमा कालो पोतिएको छ । ’
यससँगै कांग्र्रेसले क्वारेन्टीनका बेथितिहरु विरुद्ध दबाब दिन मंगलवार स्वदेश र बिदेशबाट एकसाथ प्रधानमन्त्रीलाई बिशेष ज्ञापनपत्र बुझाउने कार्यक्रम तय गरेको जनाएको छ ।
