गुल्मीमा कोभिड–१९ जाँच गर्न पीसीआर मशिन ल्याइएको छ ।

परराष्ट्रमन्त्री प्रदीप ज्ञवालीले हिमालय एयरलाइन्समार्फत शनिवार कोरोना परीक्षण गर्ने पीसीआर मशिन ल्याएर रेसुङा नगरपालिकालाई हस्तान्तरण गरेका हुन् ।

जिल्ला विपद् व्यवस्थापन समितिमार्फत रेसुङा नगरपालिकाका मेयर डिल्लीराज भुसाललाई मशिन प्रदान गरिएको छ ।

संस्थाको सामाजिक उत्तरदायित्व अन्तर्गत आफूहरूले मन्त्री ज्ञवालीको पहलमा पीसीआर मशिन प्रदान गरेको एयरलाइन्सका उपाध्यक्ष विजय श्रेष्ठले जानकारी दिए । केही समय पहिलेबाट स्थानीय तहले सदरमुकाम तम्घासमा कोभिड अस्पताल र ल्याब सञ्चालन गर्न प्रयत्न गरिरहेका थिए ।

मशिन प्रदान गर्दै ज्ञवालीले कोरोना संक्रमणले सामाजिक जीवनमा अत्यन्तै ठूलो क्षति पुगेकाले अझै ढुक्क बन्ने स्थिति नभएको बताए । उनले स्रोतसाधनका हिसाबले अहिलेसम्म कोभिड विरुद्धको लडाइँमा राम्रो सफलता मिलेको बताए । सबैभन्दा खराबको स्थिति अझै बाँकी भएकाले त्यसको तयारीमा समेत ३ वटै सरकारका संयन्त्र लाग्नुपर्नेमा ज्ञवालीले जोड दिए ।

‘अहिले मशिनको खर्चको कुरा नगरौं, मानव जीवनभन्दा खर्च ठूलो होइन,’ उनले भने, ‘सबैको सहयोगमा तुरुन्त ल्याब सञ्चालन गर्नुपर्‍यो ।’ 

परराष्ट्रमन्त्री प्रदीपकुमार ज्ञवालीले भारतसँग सार्वभौम समानता सहितको सम्बन्ध चाहेको बताए । उनले सीमानाको विषयमा आफूहरूले असल छिमेकीका नाताले २/२ पटक कूटनीतिक पहल र आग्रह गरे पनि भारतले नटेरेको आरोप लगाए ।

‘भारतले कूटनीतिक पहलको गम्भीरता बुझेन बरु सडक विस्तार भयोे,’ उनले भने, ‘राष्ट्रिय अखण्डताको विषयमा सबै दलबीच अभूतपूर्व एकता गरी नक्सा पारित गर्‍यौं ।’ अब पनि सबै दल र जनताको सहयोगमा कूटनीतिक पहलमार्फत नक्सामा कायम भएको भूभाग फर्काउन प्रयत्न गर्ने ज्ञवालीले बताए ।

गुल्मी आएका परराष्ट्रमन्त्री प्रदीपकुमार ज्ञवालीले नेकपा पार्टी कार्यालयमा नेकपा नेता कार्यकर्तालाई सम्बोधन गर्दै पार्टीभित्रको आन्तरिक समस्याले कुनै बिग्रह नआउने बताए । उनले नेकपा घरको धुरीखाँबो भएकाले भत्किए खाँबो मात्रै नभाँचिने बताए ।

ज्ञवालीले कोरोना क्षति र छिमेकको समस्या समाधानको पहलको सट्टा अहिलेले आन्तरिक कलह औचित्यपूर्ण नभएको प्रतिक्रिया दिए । ‘शान्ति प्रक्रिया र सशस्त्र संघर्षबाट आएका २ पार्टीको भावना समेट्न २ अध्यक्ष बनाइएको हो,’ उनले भने, ‘आग्रह र उत्तेजनामा आएर एकता जगमा प्रहार भत्काउन पाइँदैन ।’