काठमाडौं, १९ वैशाख– वैशाख ३१ गते हुने पहिलो चरणको स्थानीय चुनावका लागि उम्मेदवार छनौटको विषयले नेपाली कांग्रेसभित्र नयाँ विवाद सिर्जना भएको छ ।
उम्मेदवारी विवादको विषयले उग्र रुप नै लिएको छ । उम्मेदवार छनौटमा हस्तक्षेप गरेको भन्दै नेपाली कांग्रेस जुम्लाका कार्यकर्ताले सभापति शेरबहादुर देउवाको पुत्ला दहन गरेको छ ।
कांग्रेस जुम्ला समितिले चयन गरेका व्यत्तिलाई टिकट नदिएर केन्द्रबाट हस्तक्षेप गरी कान्तिका सेजुवाललाई चन्दननाथ नगरपालिकाको मेयर पदको टिकट दिएको भन्दै देउवाको पुत्ला दहन गरेका हुन् ।
जिल्ला कार्यसमितिले चन्दननाथ नगर प्रमुखमा राजुसिंह कठायतलाई बहुमतीय प्रणालिबाट सिफारिस गरेको थियो ।
यस्तै स्थानीय तह निर्वाचनका लागि उम्मेदवार छनौट गर्ने विषयमा सभापति देउवाले एकलौटी गरेको भन्दै वरिष्ठ नेता रामचन्द्र पौडेल समूहले विरोध जनाएको छ ।
काठमाडौं महानगरपालिकाको उम्मेदवार छनौटको विषयमा नेपाली कांग्रेसको सानेपास्थित केन्द्रीय कार्यालयमा कुटाकुट नै भएको छ ।
काठमाडौंको मेयरका लागि उम्मेदवार छनोटमा प्रकाशमान सिंहले मनपरि गरेको भन्दै भिमसेनदास प्रधानसहितको एक समूहले केन्द्रीय कार्यालयमा नाराबाजी गरेको छ ।
काठमाडौं कांग्रेसका पूर्वसभापतिसमेत रहेका सांसद प्रधानसहितको समूहले प्रकाशमान निकट एक कार्यकर्ता अनिल श्रेष्ठलाई कुटपिट गरेको छ ।
