२२ असार २०८३, सोमबार
कलिलो उमेरमै गाउँघरमा समाजसेवामा सक्रिय कैलालीका केपी खनाललाई भारतको नयाँदिल्लीस्थित राइजिङ्ग टुंकल फाउन्डेसनले गान्धी जयन्तीको अवसरमा सम्मानित गर्ने भएको छ ।
शुक्रवार आयोजित गान्धी जयन्तीको कार्यक्रममा २० वर्षीय खनाल सम्मानित हुन लागेका हुन् ।
कैलालीको लम्कीचुहा नगरपालिकाका स्थायी वासिन्दा खनाल समाजसेवाका लागि आपतविपतमा परेका विभिन्न क्षेत्रमा पुग्छन् । निरन्तरको समाजसेवाले उनले समाजमा स्थापित छवि बनाएका छन् ।
आर्थिक अवस्था कमजोर भएर पनि बलियो इच्छाशक्तिका कारण खनालले विभिन्न दाताबाट सहयोग जुटाएर गरीब परिवारलाई सहयोग गर्दै आएका छन् । कोरोना भाइरस संक्रमण रोकथामका लागि सरकारले गरेको लकडाउनका बेला दैनिक ज्यालादारी र मजदुरी गुमाएर भोकै बस्नुपर्ने अवस्थामा रहेका गरीब परिवारलाई खनालको पहलमा सहयोग गरिएको थियो ।
खनालको नेतृत्वमा ‘क्लिन काष्ठमण्डप’, ‘हेल्प फर निडी अभियान’ लगायत सञ्चालन भएका छन् ।
अन्तर्राष्ट्रिय क्षेत्रमा सम्मानित हुँदा आफूलाई थप हौसला मिल्ने खनालले बताए । दिल्लीबाट आएको निम्तो मान्न जानका लागि पैसा नभएपछि खनालले धनगढी उपमहानगरपालिकाका नगर प्रमुख नृप वडसँग आर्थिक सहयोग लिएका छन् ।
