१० साउन २०८३, आइतबार
कर्णाली प्रदेशका मुख्यमन्त्री महेन्द्रबहादुर शाहीविरुद्ध ‘छापामार’ शैलीमा गत आइतवार अविश्वासको प्रस्ताव दर्ता भएपछि उत्पन्न परिस्थितिको तत्कालीन व्यवस्थापन भएको छ ।
नेकपाका वरिष्ठ नेता माधवकुमार नेपाल पक्षका केही सांसदहरूलाई मन्त्री दिने भनिएपछि समस्याको तत्कालीन हल भएको हो ।
यससँगै विवादमा मुछिएका नेताहरूलाई केन्द्रका अध्यक्षद्वय पुष्पकमल दाहाल ‘प्रचण्ड’ र केपी शर्मा ओलीले काठमाडौँ झिकाउने भएका छन् ।
मंगलवार प्रधानमन्त्रीसमेत रहेका अध्यक्ष ओलीको सरकारी निवास बालुवाटारमा दुई अध्यक्षबीच यसविषयमा छलफल भएको थियो ।
छलफलमा अस्थीरता निम्त्याउने गरी कर्णालीमा भइरहेको राजनीतिक घटनाक्रमका बारेमा थप बुझ्न मुख्यमन्त्री शाही, यमलाल कँडेल, चन्द्रबहादुर शाही, पूर्व सचेतक गुलाबजंग शाहलाई दुई दिन भित्र काठमाडौँ झिकाउने सहमति बनेको हो ।
‘अध्यक्षद्वयले मलगायत अन्य केही नेताहरूलाई २ दिनभित्र काठमाडौँ बोलाउनु भएको छ,’ गुलाबजंग शाहले लोकान्तरसँग भने ।
शाहलाई मुख्यमन्त्री शाहीले प्रमुख सचेतकबाट निलम्बन गरिसकेका छन् । ‘मुख्यमन्त्री शाहीको स्वेच्छाचारिता, निरङ्कुश शैलीका बारेमा हामीले अध्यक्षद्वयसँगै छलफल गर्छौं,’ शाहले भने ।
