२२ असार २०८३, सोमबार
प्रमुख प्रतिपक्षी दल नेपाली कांग्रेसका सभापति एवं संसदीय दलका नेता शेरबहादुर देउवाले दशैं भत्ताबापत आएको रकम फिर्ता गर्न सांसदहरूलाई निर्देशन दिएका छन् ।
सभापति देउवाले पार्टीका सबै सांसदको खातामा आएको दशैं भत्ताबापतको रकम कोभिड- १९ उपचार कोषमा जम्मा गर्न निर्देशन दिएको कांग्रेस केन्द्रीय कार्यालयका मुख्य सचिव कृष्ण पौडेलले लोकान्तरलाई जानकारी दिए ।
'दशैं भत्ताबापत आएको रकम कोभिड- १९ उपचार कोषमा जम्मा गर्न सभापतिले पार्टीका सबै सांसदलाई निर्देश दिनुभएको छ,' मुख्य सचिव पौडेलले भने ।
कोरोना महामारीमा नागरिकहरूलाई हातमुख जोर्न समस्या परिरहेका बेला सांसदहरूले गत वर्षकै निर्णयका आधारमा दशैं भत्ता बुझेको समाचार लोकान्तर डट्कमले सबैभन्दा पहिले प्रकाशितगरेको थियो ।
महामारीका कारण देश नै आर्थिक संकटमा रहेका बेला संसदहरूले दशैं भत्ता बुझेकोप्रति चौतर्फी आलोचना भइरहेको छ ।
यसबीचमा केही सांसदहरूले व्यक्तिगत रूपमा नै दशैं भत्ता फिर्ता गर्ने घोषणा गरिसकेका छन् ।
