३१ असार २०८३, बुधबार
प्रधानमन्त्री केपी शर्मा ओलीले दशैंको शुभकामना दिन बनाइएको शुभकामना कार्डमा लिम्पियाधुरारहित पुरानै नक्सा प्रयोग भएको पाइएको छ । ओलीले नमस्कार गरेको तस्वीरसहित बडा दशैं २०७७ को मंगलमय शुभकामना लेखिएको कार्डमा नेपालको निशान छापमा रहेको नक्सा पुरानै देखिएको छ ।
भारतले अतिक्रमण गरेको नेपालको भूमि समेटेर सरकारले नयाँ नक्सा जारी गरेको थियो । नयाँ नक्सा सहितको निशान छाप संविधानको अनुसूचीमा मिलाउन संसदबाट संविधान संशोधन प्रस्ताव पारित गरिएको थियो ।
प्रधानमन्त्रीको शुभकामना कार्डमा पुरानै नक्सा सहितको निशान छाप प्रयोग भएको विषयलाई प्रमुख प्रतिपक्षी दल नेपाली कांग्रेसका प्रवक्ता विश्वप्रकाश शर्माले गम्भीर विमति जनाएका छन् ।
शुक्रवार सामाजिक सञ्जाल ट्वीटरमा सन्देश लेख्दै उनले लिम्पियाधुरारहित नेपालको नक्सा प्रयोगलाई सामान्य त्रुटि मान्न नसकिने बताएका हुन् ।
‘लिम्पियाधुरारहित नेपालको नक्सा प्रयोगलाई सामान्य त्रुटि कसरी मानौं सम्माननीय प्रधानमन्त्रीज्यू ? गम्भीर विमति दर्ज होस् ! देशको संसद्ले पारित गरेको नक्सा अब नक्सामै असुरक्षित भएपछि जग्गा फिर्ता गर्ने अभियान जारी कि यहाँको नेतृत्वमा बिसर्जन ?’ शर्माले ट्विटरमार्फत प्रश्न गरेका छन् ।
लिम्पियाधुरा रहित नेपालको नक्सा प्रयोगलाई सामान्य त्रुटि कसरी मानौं सम्माननिय @PM_Nepal ? गम्भीर विमती दर्ज होस् !
देशको संसदले पारित गरेको नक्सा अब नक्सामै असुरक्षित भएपछि जग्गा फिर्ता गर्ने अभियान जारी कि यहाँको नेतृत्वमा बिसर्जन ? pic.twitter.com/qUc0Er88xf— Bishwa Prakash शर्मा (@bishwaprakash77) October 23, 2020
