२५ जेठ २०८३, सोमबार
काठमाडौंका बब्लु (नाम परिवर्तन)ले काठमाडौं उपत्यकाका सामान्य घरहरूमा रंगको ठेक्कापट्टाको काम गर्दै आएका छन् ।
नयाँ घरमा पेन्टिङ गर्ने कामदार खोज्ने र उनीहरूलाई काम लगाएर केही पैसा कमाउँदै आएका छन् ।
काठमाडौंमा मानिसहरूको भीडभाड र पछिल्लो समय फैलिएको कोरोना महामारीका कारण उनलाई सार्वजनिक यातायातमा हिँड्न अलिक असहज भयो र जोखिम पनि हुने भएकाले उनले बचाएको केही पैसाले मोटरसाइकल किन्ने सोच बनाए ।
उनीसँग धेरै पैसा नभएकाले नयाँ किन्न पनि सक्ने अवस्था थिएन । अझ भन्नुपर्दा २/३ किस्ता गरेर पैसा तिर्ने योजना बनाएका थिए । र त्यस्तै मोटरसाइकलको खोजीमा थिए ।
काम गर्ने क्रममै सामान्य चिनजानका व्यक्तिले आफूसँग २२० सीसीको पल्सर मोटरसाइकल रहेको बताए ।
उनले पैसाको अभावले मोटरसाइकल बेच्न लागेको बताएका थिए ।
बाग्मती प्रदेश ०२–०३ लटको नयाँ पल्सर बाइक र आफूले भनेजस्तो २/३ किस्तामा तिरेपनि हुने भएकाले उनले किन्ने निधो गरे ।
ती व्यक्तिसँग २ लाखमा किन्ने कुरा छिने अनि आफूसँग भएको एक लाख दिएर उनले मोटरसाइकल लिए ।
त्यसको १५ दिनपछि साथीभाइसँग मागेर उनले ती व्यक्तिलाई फेरि ५० हजार दिए । बाँकी ५० हजार १ महिनापछि दिने बताए, ती व्यक्तिले पूर्वशर्तअनुसार माने ।
ती व्यक्तिले बब्लुलाई बाँकी पैसा तिरेपछि मोटरसाइकल पास गरिदिने बताएका थिए ।
उनले धादिङ घर भएका मिजार थरका एक जनाको नाममा रहेको २२० सीसीको पल्सर मोटरसाइकल २ महिना चलाए ।
त्यो बीचमा उनी धेरैपटक प्रहरी चेकिङमा परेका थिए, प्रहरीले छाडिदिएको थियो अर्थात् ब्लू बूक र मोटरसाइकलमा भएको चेसिस नम्बर एउटै भएकाले छाडिदिएको थियो ।
कात्तिक १९ गते महानगरीय ट्राफिक प्रहरीको काठमाडौंको कालीमाटीमा चेकिङ थियो । उपत्यकामा मोटरसाइकल चोरीका घटना बढेकाले महानगरीय ट्राफिक प्रहरी महाशाखाले चेकिङ राखेको थियो ।
त्यो चेकिङमा बब्लु पनि परे । उनले आफूसँग भएको ब्लू बूक देखाए । ट्राफिक प्रहरीले ब्लू बूक लियो ।
मोटरसाइकलको च्याचिस नम्बर र इञ्जिन नम्बर जाँच गर्यो । ट्राफिक प्रहरीलाई शंका लाग्यो । बब्लुलाई त्यो मोटरसाइकलको बारेमा सोध्यो उनले आफूले सेकेन्डह्यान्डमा किनेको बताए ।
प्रहरीले बब्लुलाई लाइसेन्स, ब्लू बूक र उनको मोबाइल नम्बर लिएर छाड्यो ।
महानगरीय प्रहरी महाशाखाले मोटरसाइकल र ब्लू बूकमा भएको इञ्जिन नम्बर र च्याचिस नम्बर फरक भएको शंका लागेपछि प्रहरीको विधिविज्ञान प्रयोगशालामा जाँचका लागि पठायो ।
प्रयोगशालाले मोटरसाइकलको च्याचिस र इञ्जिन नम्बर मेटाएर ब्लू बूकमा भएको च्याचिस नम्बर र इञ्जिन नम्बर राखेको प्रमाणित गरेर पठाएको महानगरीय ट्राफिक प्रहरी महाशाखाका प्रहरी निरीक्षक (इन्सपेक्टर) जितेश दाहालले बताए ।
‘हामीले त्यो मोटरसाइकललाई विधिविज्ञान प्रयोगशालामा पठाएर परीक्षण गर्दा ब्लू बूकमा भएको इञ्जिन नम्बर र च्याचिस नम्बर फरक भएको रिपोर्ट आएको छ,’ इन्सपेक्टर दाहालले लोकान्तरसँग भने, ‘यसरी हेर्दा मोटरसाइकल चोरेर इञ्जिन र च्याचिस नम्बर परिर्वतन गरेको देखियो ।’
इन्सपेक्टर दाहालका अनुसार चोरीको मोटरसाइकलमा सडकमा भेटिएको ब्लू बूकको इञ्जिन र च्याचिस नम्बर परिर्वतन गरेर अर्कैलाई बेचेको पाइएको छ ।
मोटरसाइकल बेच्ने व्यक्तिले मोबाइल नम्बर अफ गरेर राखेका मोटरसाइकल बेच्ने व्यक्ति को हुन् ? भन्ने कुरा पत्ता लगाउन नसकिएको दाहालले बताए ।
ट्राफिक प्रहरीले मोटरसाइकल चोरी गरेर भेट्टाएको ब्लू बूकको च्याचिस र इञ्जिन नम्बर परिर्वतन गरेर बिक्री गर्ने गरेको पुष्टि भएको बताएको छ ।
ट्राफिक प्रहरीले ती व्यक्ति चोरी गर्ने गिरोहमध्येका हुन सक्ने भएकाले खोजी गरिरहेको महानगरीय ट्राफिक प्रहरी महाशाखाका प्रमुख वरिष्ठ प्रहरी उपरीक्षक (एसएसपी) भीम ढकालले बताए ।
‘हामीले मोटरसाइकलको च्याचिस र इञ्जिन नम्बर नै परिर्वतन गरेर बिक्री गर्ने गिरोह नै भएको हुनसक्ने अनुमान गरेका छौं र खोजी पनि गरिरहेका छौं,’ एसएसपी ढकालले लोकान्तरसँग भने ।
एसपी ढकालका अनुसार मोटरसाइकल चोरी गरेर इञ्जिन नम्बर नै परिवर्तन गरेर चलाउने, पार्टपूर्जाहरू झिकेर अन्यन्त्र बिक्री गर्ने गरेका छन् ।
विषेश गरेर उपत्यकाका अस्पताल, शपिङ मल, पार्किङ क्षेत्र, दैनिक पार्किङ गर्ने घर लगायतका ठाउँलाई चोरले टार्गेट गर्ने गरेको प्रमुख ढकालले बताए ।
३/४ लाख पैसा खर्च गरेर मोटरसाइकल किन्ने सवारीधनीले सामान्य खालका सुरक्षाको उपकरणहरू प्रयोग नगर्दा मोटरसाइकल हराउने गरेको छ ।
मोटरसाइकललाई सुरक्षा गर्न डिस लक, साइरन लगायतका सुरक्षा उपकरणहरू जडान गर्दा चोरीबाट जोखिन सक्ने एसएसपी ढकालले बताए ।
