नेकपा वरिष्ठ नेता माधवकुमार नेपालले कात्तिक २७ गते नेकपा सचिवालय बैठक बस्ने र सो बैठकमा प्रधानमन्त्री एवं पार्टी अध्यक्ष केपी शर्मा ओली पनि सहभागी हुने दाबी गरेका छन् ।

पार्टी कार्यालय धुम्बाराहीमा मंगलवार बसेको नेकपा सचिवालयका ५ सदस्यको अनौपचारिक बैठकपछि बाहिरिने क्रममा नेता नेपालले बिहीवार सचिवालय बैठक बस्ने बताएका हुन् । 

सचिवालयका पाँचजना नेताको बैठकले २७ गते सचिवालय बैठक राख्न अध्यक्ष ओलीलाई आग्रह गर्ने निर्णय गरेको थियो ।

‘२७ गते सचिवालय बैठक बस्छ, सो बैठकमा अध्यक्ष ओली पनि सहभागी हुनुहुन्छ,’ नेता नेपालले भने । 

धुम्बाराहीमा बैठक बस्नुअघि नेकपा कार्यकारी अध्यक्ष पुष्पकमल दाहाल प्रचण्डले ओलीलाई भेटेर २७ गते बैठक राख्न प्रस्ताव गरेका थिए । तर ओली सहमत नभएको ब्रिफिङ प्रचण्डले सचिवालयका बहुमत सदस्यको अनौपचारिक बैठकमा गराएका थिए । 

मंगलवारको अनौपचारिक बैठकमा अध्यक्ष प्रचण्ड, वरिष्ठ नेता माधवकुमार नेपाल, वरिष्ठ नेता झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठ पनि बैठकमा उपस्थित थिए । 

सचिवालयका बहुमत सदस्यको बैठक शुक्रवार पनि बसेका थियो । शुक्रवारको अनौपचारिक बैठकबाट उनीहरूले सचिवालय बैठक बोलाउन ओलीसँग लिखित आग्रह गर्ने निर्णय गरेका थिए । 

सचिवालयका ५ सदस्यले शनिवार ओलीसँग सचिवालय बैठक बोलाउन आग्रह गरेपनि ओली सहमत भएका थिएनन् ।