आस्था राउतको सांगीतिक टुरको शेड्युल निकै व्यस्त थियो । कहिले अमेरिका, कहिले जापान, कहिले दुबई । दुबईबाट फर्किएको भोलिपल्टै झापा अनि बुटवल ।  बुटवलबाट फर्किएको केही दिनमा पोखरा, नेपालगञ्ज अनि दार्जिलिङ । त्यसपछि फेरि विदेश ।

यसैगरी उनको सांगीतिक टुर चलिरहेको थियो । एक्कासि कोरोना महामारीले नेपालमा पनि प्रभाव जमायो । सरकारले लकडाउनको घोषणा गरेपछि आस्थाले मौखिक सहमति जनाएका नेपाल तथा बाहिरका केहि सांगीतिक कार्यक्रम रद्द भए । आम मानिसजस्तै आस्थाको जीवन पनि घरभित्रै लकडाउनमा थुनियो । आस्था भन्छिन्, ‘स्वास्थ्यको सबैभन्दा ख्याल गर्नुपर्ने समय थियो त्यो । तर, अब बिस्तारै जीवन कसरी चलाउने भन्ने ठूलो तनावले सताएको छ ।’

खासमा गायक–गायिकाको कमाइ हुने सबैभन्दा बलियो पाटो हो, स्टेज । आस्थाको पनि स्टेजबाटै जीवन चलिरहेको थियो । तर, ९ महिनादेखि कुनैपनि सांगीतिक कार्यक्रम सञ्चालनमा आएका छैनन् । यसले आस्थालाई मात्रै चिन्तित बनाएको छैन, आम कलाकारहरूको मुख सुकाएको छ । आस्था थप्छिन्, ‘यो असाध्यै चिन्ताको विषय हो । तर, जबरजस्ती कुनैपनि संघसंस्थाले भीडभाड गरेर कुनै कार्यक्रम गर्छन् जस्तो मलाई लाग्दैन ।’

आस्थाले स्वयं आफूहरूलाई पनि भीडभाडमा जान डर हुने भएकाले सांगीतिक कार्यक्रम चलायमान हुनका लागि कोरोनाको औषधि आउनुपर्ने उनको तर्क छ ।

कोरोना महामारीले अझै छाडेको छैन । नेपाली कलाकारहरूको सांगीतिक कार्यक्रमको केन्द्र विदेश हो । तर, अधिकांश मुलुक अझै कोरोना महामारीबाट मुक्त भएका छैनन् । सोही कारण पनि यो वर्ष स्टेज चढेर राम्रो आम्दानी गर्ने कलाकारको सपना हराएको छ ।

यसवर्ष नेपाल तथा बाहिरका विभिन्न स्थानमा हुने सांगीतिक कार्यक्रम ठप्प हुने अनुमान गरिएको छ । गीत रेकर्ड त भइरहेको छ, म्युजिक भिडियोहरू पनि बनिरहेका छन्, आस्था थप्छिन्, ‘स्टेज कार्यक्रम हुँदाको जीवन र नहुँदाको जीवन धेरै फरक हो । यसले म मात्रै होइन नेपालका धेरै गायक–गायिकाको जीवनमा ठूलो प्रभाव पारेको छ ।’

यदि अरू केही वर्ष सांगीतिक कार्यक्रम नभए ? कोरोनाको औषधि समयमै नेपालमा आएन भने ? आस्था थप्छिन्, ‘चल्न त जसोतसो जीवन चल्छ । तर, सहज पक्कै नहोला । त्यसका लागि केही विकल्प सोच्नुपर्ने हुन्छ ।’